ریاض سہیل بی بی سی اردو ڈاٹ کام، کراچی

	ماہی گیروں کو گزشتہ دو سالوں میں پاکستانی حدود کی خلاف ورزی کے الزام میں گرفتار کیا گیا تھا

مذکورہ ماہی گیروں کی رہائی دونوں ممالک کے وزراء کے درمیان دہشت گردی اور منشیات کی سمگلنگ کے مسائل پر بات چیت سے ایک دن قبل ہوئی ہے۔

پیر کو کراچی کی لانڈھی جیل سے چھتیس اور جونائل جیل سے پینتیس ماہی گیروں کو رہا کیا گیا۔

ان ماہی گیروں کو گزشتہ دو سالوں کے دوران پاکستان کی حدود کی خلاف ورزی کرنے کے الزام میں گرفتار کیا گیا تھا۔ یہ ماہی گیر مچھلی کا شکار کرتے ہوئے پاکستان کی سمندری حدود میں داخل ہوگئے تھے۔ ماہی گیروں کو دو بسوں کے ذریعے کراچی سے لاہور روانہ کیا گیا ہے۔

ان ماہی گیروں کے سفر کا بندوبست انصار برنی ٹرسٹ کی جانب سے کیا گیا تھا۔ واضح رہے کہ بھارت نے چھبیس مئی کو انسٹھ پاکستانی ماہی گیروں کو آزاد کیا تھا جو پیر کو واہگہ پہنچے ہیں۔

کراچی کی لانڈھی اور جونائل جیلوں میں اس وقت بھی چار سو چونتیس بھارتی ماہی گیر آزادی کے منتظر ہیں۔

یاد رہے کہ پاک بھارت سمندری حدود کی واضح حد بندی نہ ہونے کی وجہ سے ماہی گیر گہرے سمندر میں ایک دوسرے کی حدود میں داخل ہوجاتے ہیں۔