ریاض سہیل
بی بی سی اردو ڈاٹ کام کراچی |  |
| | | دوسرے ضمنی انتخابات میں بھی پہلے والے امیدوار میدان میں ہیں |
سندھ میں قومی اسمبلی کے ایک حلقے میں ہفتے کے روز دوسری مرتبہ ضمنی انتخابات ہو رہے ہیں۔ الیکشن کمیشن نے جیکب آباد کے حلقہ دو سو دس کشمور کی اس نشست پر ضمنی انتخابات میں حکومتی امیدوار کی دھاندلی تسلیم کرتے ہوئے نتائج کالعدم قرار دیے تھے اور دوبارہ انتخاب کرانے کا حکم دیا تھا۔ یہ نشست حکمران جماعت کے ممبر سلیم جان مزاری کے مستعفی ہونے پر خالی ہوگئی تھی اور اس پر دس دسمبر کو ضمنی انتخاب کرایا گیا تھا۔ ضمنی انتخابات میں حکمران مسلم لیگ کے امیدوار میر غالب حسین ڈومکی اور پیپلز پارٹی کے امیدوار میر عمران خان بجارانی کے درمیان مقابلہ ہوا تھا۔ ہفتے کو ہونے والے انتخابات میں بھی دونوں امیدوار ایک مرتبہ پھر مد مقابل ہیں۔ اس حلقہ میں کل دو لاکھ اکہتر ہزار ساڑھے سات سو کے قریب ووٹر ہیں۔ ڈی پی او کشمور شہاب مظہر علی نے بی بی سی کو بتایا کہ انتخابات کے لیے دوسو اکسٹھ پولنگ اسٹیشن بنائی گئی ہیں جن میں سے پچہتر حساس قرار دی گئی ہیں۔ انہوں نے بتایا کہ تین ہزار کے قریب پولیس نفری مقرر کی گئی ہے جس میں سے اٹھائیس فیصد اسی ضلع کی ہے باقی پڑوسی اضلاع سے منگوائی گئی ہے۔ یاد رہے کہ اس سے قبل ہونے والے ضمنی انتخابات کے نتائج کے مطابق حکومتی امیدوار نے ڈیڑھ لاکھ کے قریب جبکہ پیپلز پارٹی کے امیدوار نے سولہ ہزار آٹھ سو ووٹ حاصل کیے تھے۔ واضح رہے کہ صوبہ سندھ کی حکومت نے جیکب آباد ضلع کو توڑ کر اس میں سے کشمور نامی نیا ضلع بنایا اور سردار سلیم جان مزاری قومی اسمبلی کی نشست چھوڑ کر ضلع ناظم منتخب ہوئے۔ | 
جیکب آباد: انتخابی نتائج کالعدم 
