فراز ہاشمی بی بی سی اردو ڈاٹ کام، اسلام آباد

	زلزلے سے اسلام آباد کے مارگلہ ٹاور کے دو بلاک منہدم ہو گئے تھے

سی ڈی اے کے بلڈنگ کنٹرول کے ڈائریکٹر غلام مرتضیٰ ملک نے بتایا کہ جن عمارتوں کو نوٹس جاری کیے گئے ہیں ان میں پاکستان ٹیلی ویژن کی عمارت کے علاوہ کئی سرکاری عمارتیں بھی شامل ہیں۔

انہوں نے کہا کہ اسلام آباد میں دو درجن کے قریب کثیرالمنزلہ عمارتوں میں سے صرف دو نے عمارت کے مکمل ہونے کا کمپلیشن سرٹیفکیٹ حاصل کیا ہے جبکہ باقی کسی عمارت نے ایسا سرٹیفیکٹ حاصل نہیں کیا۔ غلام مرتضی ملک نے کہا کہ ان میں سے بیشتر عمارتوں میں زلزلے سے دراڑیں آئی ہیں۔

دارالحکومت کے ترقیاتی ادارے نے دو زیرِ تعمیر عمارتوں میں جاری کام بھی فوری طور پر رکوانے کے احکامات جاری کر دیے ہیں۔ ان عمارتوں پر تعمیراتی کام کو بند کرنے کے حکم کے ساتھ سی ڈی اے نے کہا ہے کہ ان عمارتوں پر اس وقت تک کام نہیں کیا جائے جب تک سی ڈی اے تعمیر کے نئے قواعد و ضوابط وضع نہیں کر لیتی۔

سی ڈی اے کے قوانین کے مطابق ہر عمارت کی تعمیر مکمل ہونے پر کمپلیشن سرٹیفیکٹ حاصل کرنا ضروری ہے۔ سی ڈی اے کے انجینئر تعمیر کے مکمل ہونے پر عمارت کا معائنہ کر کے تعمیری میٹریل اور تعمیری معیار کے بارے میں سرٹیفیکٹ جاری کرتے ہیں۔