صدر مشرف نے مختاراں کو امریکہ جانے کے اجازت دینےسے انکار کر دیا تھا

صدر مشرف نے کہا تھا کہ ’ آپ کو پاکستان کے حالات کو سمجھنا چاہیے۔ یہ پیسہ کمانے کا ایک ذریعہ بن گیا ہے۔ بہت سے لوگ کہتے ہیں کہ اگر آپ باہر جانا چاہتے ہیں یا کینیڈا کی شہریت یا ویزہ لینا چاہتے ہیں تو خود کو ’ریپ‘ کروا لیں‘۔

صدر مشرف نے یہ بات انٹرویو کے دوران مختاراں مائی سے متعلقہ سوال پر کہی۔ مختاراں مائی نے اس بیان پر بی بی سی سے بات کرتے ہوئے کہا کہ کوئی بھی عورت پیسوں کے لیے اپنے آپ کو اس گھناؤنے عمل سے نہیں گزار سکتی۔

مختاراں مائی کا کہنا تھا کہ ’ میں انصاف کے بدلے اس گینگ ریپ کے بعد ملنے والی تمام رقم صدر مشرف کو دینے کیلیے تیار ہوں‘۔

اپوزیشن رکنِ اسمبلی شیری رحمان نے کہا کہ ’ مجھے یہ جان کر دھچکا لگا کہ صدر جنرل مشرف خواتین کے بارے میں اتنی نچلی ذہنیت کے مالک ہیں۔ ان کے بیان پر ساری قوم کا سر شرم سے جھک گیا ہے‘۔

	مختاراں مائی

پاکستان میں حقوقِ انسانی کے لیے کام کرنے والی کاملہ حیات نے خبر رساں ادارے اے ایف پی کو بتایا کہ ’ یہ ملک میں ہونے والے زیادتی کے واقعات کو جانچنے کا انتہائی فضول طریقہ ہے‘۔

کاملہ حیات کا کہنا ہے کہ پاکستان میں گزشتہ برس کے دوران ریپ یا گینگ ریپ کے آٹھ سو واقعات رپورٹ ہوئے اور یہ اصل واقعات کا عشرِ عشیر بھی نہیں ہیں۔

اے ایف پی کے مطابق پاکستان کے ایک نجی حقوقِ انسانی کمیشن کا کہنا ہے کہ زیادتی کا شکار ہونے والی خواتین میں سے صرف ڈاکٹر شازیہ خالد نے ملک چھوڑا اور انہوں نے بھی یہ قدم بظاہر حکومت کی درخواست پر اٹھایا۔

ڈاکٹر شازیہ نے بی بی سی اردو ڈاٹ کام کو انٹرویو میں بتایا تھا کہ انہوں نے پاکستان اس لیے چھوڑا کیونکہ زیادتی کا شکار ہونے اور اس کیس کے میڈیا میں آنے کے بعد ملٹری انٹیلیجنس کے ایک میجر نے انہیں ملک چھوڑنے کا مشورہ دیا تھا۔