ریاض سہیل کراچی

جسٹس سرمد جلال عثمانی اور جسٹس امیر مسلم ہانی پر مشتمل ہائی کورٹ کی ڈویژن بینچ نے ڈپٹی اٹارنی جنرل کو آئندہ سماعت پر طلب کرلیا ہے۔

حکومت پنجاب کی زیر نگرانی بینک آف پنجاب نے پی ڈی ایف اسکیم شروع کی ہے۔ جس ٹکٹ کی مالیت پچیس روپے ہے۔ جبکہ سب سے بڑا انعام ڈھائی کروڑ ہے۔ دیگر انعامات سات کروڑ کی مالیات کے ہیں۔

پچیس روپے میں کروڑ پتی بنیے کے نام سے شروع کی گئی اس اسکیم کی قرعہ اندازی گیارہ جون سینچر کے روز ہونی تھی۔

لاڑکانہ کے رہائشی سجاد بھٹی نے عدالت میں پٹیشن دائر کی تھی جس میں انہوں نے کہا کہ انہوں نے پنجاب ڈویلپمنٹ فنڈ کی کروڑ پتی اسکیم کے لاڑکانہ سے اکتیس انعامی ٹکٹ خریدے تھے۔ جن میں دو ٹکٹ ایک ہی نمبر کے ہیں۔جو خلاف قانون ہے ۔

درخواست گذار نے عدالت سے گذارش کی کہ پی ڈی ایف اسکیم کو روکا جائے۔
سجاد بھٹی کے وکیل آصف سومرو نے انعامی اسکیم کے بارے میں وفاقی شریعت کورٹ کے ایک فیصلے کا حوالا دیا اور کہا کہ شریعت کورٹ نے انعامی سکیموں کو اسلامی تعلیمات کے خلاف قرار دیا ہے۔

جس کی سندھ کے اسٹنٹ ایڈووکیٹ جنرل عبدالجبار لاکھو نے بھی تائید کی۔
پنجاب ڈویلپمنٹ فنڈ کی جانب سے شیخ منصور ایڈووکیٹ نے عدالت کو بتایا کہ گیارہ جون کو پی ڈی ایف کی قرعہ اندازی کے لیے تمام انتظامات مکمل کرلیے گئے ہیں۔ جبکہ انعامات کی تقسیم پندرہ روز کے اندر کی جائیگی۔

پنجاب کے ایڈووکیٹ جنرل آفتاب چودھری نے عدالت کو بتایا کہ اسے ایک دن پہلے ہی عدالت سے نوٹس ملا ہے اور عدالت میں جواب داخل کرنے کے لیے مہلت درکار ہے۔

سندہ ہائی کورٹ نے انعامات کی تقسیم روکنے کا حکم دیتے ہوئے حکم دیا کہ مقدمے کی اگلی سماعت تئیس جون کو ہو گی۔