اعجاز مہر بی بی سی اردو ڈاٹ کام، لاہور

وفاقی وزیر کے مطابق مہدی حسن نے بھارت علاج کرانے کی اجازت کے لیے حکومت کو تاحال کوئی درخواست نہیں دی ہے

یہ منظوری منگل کے روز وفاقی وزیر ثقافت، کھیل اور نوجوانوں کے امور محمد اجمل خان کی صدارت میں ’پاکستان کلچر آرٹس اینڈ سپورٹس فاؤنڈیشن فنڈ‘ کی انتظامی کمیٹی کے اجلاس میں دی گئی۔

وزیر نے بی بی سی سے بات کرتے ہوئے بتایا کہ دونوں فنکاروں نے پاکستان کا نام روشن کیا اور حکومت کا فرض ہے کہ وہ ان کی مدد کرے۔

ایک سوال پر انہوں نے بتایا کہ نامور غزل گائیک مہدی حسن نے بھارت علاج کرانے کی اجازت کے لیے حکومت کو تاحال کوئی درخواست نہیں دی ہے۔

وزیر نے بتایا کہ ملک بھر کے دو سو کے لگ بھگ آرٹسٹوں اور کھلاڑیوں کے لیے امداد کی بھی منظوری دی ہے جو دو ہزار سے تیس ہزار کے درمیان ہے۔

وزارت ثقافت، کھیل اور نوجوانوں کے امور میں قائم اس فنڈ میں اسی کروڑ روپوں کے لگ بھگ رقم جمع ہے اور ہر سال جو بھی اس کا منافع ہوتا ہے وہ ضرورت مند فنکاروں اور کھلاڑیوں میں تقسیم کیا جاتا ہے۔

محمد اجمل خان کے مطابق مشہور مزاحیہ فنکار رنگیلا اس وقت ہسپتال میں زیر علاج ہیں جبکہ مہدی حسن کی حالت کچھ بہتر ہے۔

جب ان سے پوچھا گیا کہ مہدی حسن اور رنگیلا کے ورثا کا مطالبہ ہے کہ حکومت ان کا علاج کرائے تو وزیر نے کہا کہ ’اتنی بڑی رقم انہیں علاج کے لیے ہی دی جا رہی ہے۔‘

انہوں نے بتایا کہ قواعد کے مطابق ان کے اختیار تیس ہزار روپوں تک کی امداد منظور کرنے کے ہیں لیکن انہوں نے دونوں فنکاروں کی حالت کی خاطر خصوصی اختیارات کے تحت دو لاکھ روپوں کی امداد منظور کی۔