مبشر زیدی بی بی سی اردو ڈاٹ کام، کراچی

آفرین بیگ نے مشہور مزاحیہ پروگرام شو ٹائم سے اپنے ایکٹنگ کیریئر کا آغاز کیا تھا

کلفٹن پولیس نے دعویٰ کیا ہے کہ محمد بخش اور اس کی بیوی زاہدہ جو آفرین بیگ کے گھریلو ملازم تھے نے ان کو قتل کرنے کا اعتراف کر لیا ہے۔ ان کو ہفتے کی شب پنڈی بھٹیاں سے گرفتار کیا گیا ہے۔

آفرین بیگ پندرہ اکتوبر کو کلفٹن میں واقع اپنے گھر میں پرسرار طور پر مردہ پائی گئی تھیں۔

پولیس کے مطابق ان دونوں نے تیرہ اکتوبر کی رات آفرین بیگ کو رسیوں سے باندھ کر ان سے زبردستی دو لاکھ اسی ہزار کا ایک چیک سائن کروایا اور چودہ اکتوبر کی صبح ان کو باتھ ٹب میں ڈبو کر ہلاک کر دیا۔

پولیس نے ملزمان کے قبضے سے آفرین بیگ کی جیولری اور کپڑے بھی برآمد کئے ہیں۔

ملزمان کو کل کراچی لایا گیا ہے اور ان کو دو دن کے بعد ریمانڈ کے لئے عدالت میں پیش کیا جائے گا۔

پاکستان ٹیلیوژن کے مشہور مزاحیہ پروگرام شو ٹائم سے اپنے ایکٹنگ کیریئر کا آغاز کرنے والی آفرین بیگ پچھلے چند سالوں سے پروڈکشن کر رہی تھیں اور انہوں نے ’چاندنی راتیں‘ اور ’کبھی کبھی پیار میں‘ جیسی کامیاب ڈرامہ سیریلز بنائیں جو سامعین میں بہت مقبول ہوئیں۔