علی سلمان لاہور

دھماکے کے نتیجے میں مسجد کے درو دیوار لہو میں نہا گئے

شہر کے کئی علاقوں میں شدید کشیدگی ہے اور اس موقع پر کسی ممکنہ ردعمل کے پیش نظر مختلف مقامات پر بڑی تعداد میں پولیس کے اہلکار تعینات کر دیے گئے ہیں۔

اس مقصد کے لیے را ت گئے تک لاہور پولیس کے افسروں کا اجلاس جاری رہا جس میں پیر کو امن وامان کی صورتحال برقرار رکھنے کے لیے اقدامات کی بارے میں فیصلے کیے گئے۔

اتوار کو اندرون لاہور کی تنگ گلیوں کے بیچ واقع شیعہ مسلمانوں کی مسجد میں خودکش بم دھماکے کے بعد علاقے میں سخت کشیدگی پیدا ہو گئی تھی اور مشتعل افراد نے پولیس اہلکاروں کو زدوکوب کرنے کے بعد امام بارگاہ اور اس کے ارد گرد کے علاقے سے باہر نکال دیا تھا۔

جس کے بعدف پولیس نے گردو ونواح میں بھاری نفری تعینات کردی گئی تھی۔

رات گئے مشتعل افراد نے اندرون شہر کے باہر سرکلر روڈ پر ٹائر جلا کر ٹریفک بلا کر دی اور حکومت اور پولیس کے خلاف نعرے بازی کی۔ایک گھنٹہ تک ٹریفک بلاک کیے رکھنے کے بعد مظاہرین واپس امام بارگاہ کی طرف چلے گئے۔

اس سے قبل دھماکے بعد پولیس نے جب لاشیں اٹھالی تھیں تو مکینوں کے ایک گروپ نے مشتعل ہوکر پولیس اہلکاروں پر حملہ کر دیا اور لاہور پولیس کے ایک افسرکو بھی دھکے دیے گئے، چند اہلکاروں کی خاصی پٹائی کی گئی جس کے بعد پولیس نہ صرف امام بارگاہ اور اس سے ملحق مسجد بلکہ اس کے ارد گرد کی تنگ گلیوں سے بھی نکل گئی۔

ان کی جگہ مقامی لٹھ بردار افراد نے نگرانی کرتے رہے۔ رات گئے تک لوگوں کی ایک بڑی تعداد لاٹھیاں لیے امام بارگاہ حسینیہ اور اس سے ملحق مسجد کشیمریاں میں موجود تھی اور کسی اجنبی کو وہاں سے گزرنے کی اجازت نہیں تھی۔

مشتعل افراد نے صحافیوں کو بھی زدو کوب کیا اور دو صحافیوں کے کیمرے بھی توڑ دیے گئے۔ رات کے پچھلے پہر پولیس کے اہلکاروں کو اندر جانے کی اجازت تو مل گئی لیکن لوگوں میں اشتعال پایا جا رہا تھا۔

اس واقعہ کے بعد شہر میں حالات کو کنٹرول میں رکھنے کے لیے اہم مذہبی مقامات امام بارگاہوں اور مساجد کے َآس پاس پولیس کی بھاری نفری تعینات کر دی گئی ہے شہر کے مختلف علاقوں میں پولیس نے ناکے بھی لگا دیے ہیں۔

پولیس کو بتایاگیا ہے کہ ہلاک شدگان میں سے دو کی میتیں بعدازاں صوبہ سرحد کے علاقوں کوہاٹ اور سوات روانہ کر دی جائیں گی۔