عدنان عادل بی بی سی اردو ڈاٹ کام، لاہور

دھماکے میں ہلاک ہونے والے افراد کی تعداد بڑھ سکتی ہے

پولیس کا کہنا ہے کہ یہ ایک خود کش دھماکہ ہو سکتا ہے۔

مقامی افراد نے خیال ظاہر کیا ہے کہ اس دھماکے سے مرنے والوں کی تعداد بڑھ سکتی ہے۔

سیالکوٹ کے ضلعی پولیس افسر نثار سرویہ نے کہا کہ لوگ پولیس کو امام بارگاہ کے اندر نہیں جانے دے رہے۔ کچھ لاشیں ابھی تک مسجد کے اندر موجود ہیں اور پولیس نے اس جگہ کو گھیرے میں لیا ہوا ہے اس لیے مرنے والوں کی صحیح تعداد کا تعین نہیں ہورہا۔

عینی شاہدین کے مطابق کہ راجہ روڈ پر مصروف کاروباری اور رہائشی علاقہ میں واقع اس مسجد اور امام بارگاہ میں ، جسے مستری عبداللہ کی مسجد یا زینبیہ امام بارگاہ کہتے ہیں، جمعہ کے خطبے کے دوران میں ایک شخص ایک بریف کیس لے کر داخل ہوا اور چند منٹ کے بعد دھماکہ ہوگیا جس سے مسجد میں ہر طرف دھواں چھا گیا اور اس کے شیشے ٹوٹ گئے۔

دھماکے کے وقت مسجد کا ہال نمازیوں سے بھرا ہوا تھا۔ اس میں تقریبا ایک ہزار لوگوں کے بیٹھنے کی جگہ ہے۔ دھماکہ اتنا شدید تھا کہ اس کی آواز دور دور تک سنی گئی اور فرش میں ڈیڑھ فٹ گہرا اور دو فٹ چوڑا گڑھا پڑ گیا۔

مقامی پولیس کے ایس ایچ او آصف جوئیہ کا کہنا ہے کہ یہ خود کش دھماکہ ہے۔ اس جگہ سے ملنے والے مشکوک بریف کیس کو بم ڈسپوزل اسکواڈ نے قبضہ میں لے لیا ہے۔

مسجد زینبیہ کا اندرونی حصہ دھماکے کے بعد

زخمیوں کو مقامی ہسپتالوں میں پہنچایا گیا ہے جہاں ضلعی ناظم نعیم جاوید کےمطابق ایمرجنسی کا اعلان کر دیا گیا ہے۔ ان کا کہنا ہے کہ مسجد کے باہر حفاظت کے لیے پولیس گارڈ تعینات تھے۔