عدنان عادل بی بی سی اردو ڈاٹ کام ، لاہور

احمد ی اس جگہ کو دیوبندی فرقے کے لوگوں کو دینے کے لیے تیار نہیں

فریقین میں کسی متوقع تصادم کو روکنے کے لیے انتظامیہ نے علاقے میں پولیس کی بھاری نفری تعینات کر دی ہے۔

چناب نگر میں دیوبندی علما نے ریلوے اسٹیشن کی جامع مسجد میں جمعہ کی نماز کے بعد ایک اجتماع طلب کیا تھا جس میں وہ سابقہ پولیس چوکی کی جگہ پر بنی ہوئی مسجد کو جماعت احمدیہ سے لینے کے معاملہ پر حکومت سے احتجاج کرنے کا ارادہ رکھتے تھے۔

چناب نگر پولیس کے مطابق سہ پہر دو بجے تک دیوبندی علما جامع مسجد میں اکٹھا ہونا شروع ہوگۓ تھے اور پولیس نے جگہ جگہ ناکہ بندی کررکھی تھی۔

چناب نگر میں احمدی مسلک نے اپنی آبادی میں پولیس کو ایک چوکی بنانے کے لیے جگہ دی تھی جہاں مسلمان ملازمین نے ایک مسجد تعمیر کرلی تھی۔ کچھ عرصہ پہلے وہ چوکی وہاں سے ختم کردی گئی تو مسجد بھی جماعت احمدیہ کے پاس چلی گئی۔ اس جگہ تمام آبادی احمدی مسلک سے تعلق رکھنے والوں کی ہے۔

اب علماۓ دیوبند مطالبہ کررہے ہیں کہ مسجد چونکہ بن گئی ہے اور مسلمانوں کی عبادت گاہ ہے اس لیے اسے قائم رکھا جائے اور ان کے (دیو بندی مسلمانوں) سپرد کردی جاۓ۔ جماعت احمدیہ اس کے لیے تیار نہیں۔

جماعت احمدیہ خود کو مسلمان قرار دیتی ہے لیکن مسلمانوں کے دوسرے فرقے انہیں غیرمسلم سمجھتے ہیں اور پاکستان کے آئین میں ایک ترمیم کے ذریعے انہیں غیرمسلم قرار دیا گیا ہے۔