ہارون رشید
بی بی سی اردو ڈاٹ کام، پشاور |  |
|  مظاہرے میں ارکان اسمبلی نے بھی حصہ لیا |
صوبہ سرحد میں حقوقِ انسانی کی تنظیموں کے کارکنوں نے سنیچر کو صوبائی دارالحکومت پشاور میں نوشہرہ کے اس واقعہ کے خلاف احتجاجی مظاہرہ کیا جس میں ایک پندرہ سالہ لڑکی کی سرعام بے عزتی کی گئی تھی۔ مختلف غیرسرکاری تنظیموں کے مشترکہ پلیٹ فارم جائنٹ ایکشن کمیٹی کے زیراہتمام اس مظاہرے میں سرحد اسمبلی کی خواتین اراکین کے علاوہ سیاسی جماعتوں کے رہنماؤں نے بھی شرکت کی۔ مظاہرین نے جن میں اکثریت خواتین کی تھی بینرز اور پلے کارڈ اٹھا رکھے تھے جن پر خواتین کو تحفظ فراہم کرنے اور عورتوں کی بے حرمتی کو ایک شرمناک فعل قرار دیا گیا تھا۔ اس موقعہ پر اپنے خطاب میں مقررین نے عورتوں کی بے حرمتی کے بڑھتے ہوئے واقعات پر سخت تشویش کا اظہار کیا۔ عوامی نیشنل پارٹی کے نائب صدر حاجی محمد عدیل نے کہا کہ قدامت پسند معاشرہ ہونے کی وجہ سے بہت سی خواتین کی بےعزتی کے واقعات سامنے ہی نہیں آتے۔ انہوں نے کہا اس اس کے باوجود اب تک سرحد میں عورتوں کے خلاف تشدد یا زیادتی کے تقریباً چالیس مقدمات کا اندراج پولیس کرچکی ہے۔ گزشتہ روز پشاور ہائی کورٹ کے چیف جسٹس جسٹس میاں شاکر اللہ جان نے نوشہرہ کی پندرہ سالہ رافعہ کی بے عزتی کے واقعہ کا نوٹس لیتے ہوئے ڈسٹرکٹ اینڈ سیشن جج نوشہرہ کو تحقیقات کرنے کا حکم دیتے ہوئے اسے جلد از جلد مکمل کرنے کی ہدایت کی گئی تھی۔ دوسری جانب سرحد پولیس کے سربراہ رفعت پاشا نے بھی گزشتہ روز نوشہرہ کا دورہ کیا اور اس واقعہ میں ملوث تمام ملزمان کی جلد گرفتاری کا حکم دیا۔ البتہ ابھی اس واقعہ کی تحقیقات میں مزید کسی پیش رفت کے آثار نظر نہیں آ رہے۔ پولیس ایف آئی آر میں نامزد چھ میں سے صرف ایک ہی کو گرفتار کر سکی ہے۔ | 
یہ صفحہ دوست کو ای میل کیجیئے
پرِنٹ کریں
