 |  سپریم کورٹ منظور وٹو کو طبی بنیادوں پر پہلے ہی ضمانت پر رہا کر چکی ہے |
انسداد بدعنوانی کی ایک خصوصی عدالت نے پنجاب کے سابق وزیراعلی میاں منطور احمد وٹو کو بدعنوانی کے ایک سے زیادہ مقدمات سے بری کردیاہے۔ آج سینئیر سپیشل جج براۓ انسداد بدعنوانی فیض طالب نے ایک مختصر فیصلہ میں منظور وٹو اور ان کے شریک ملزموں کو پنجاب انٹی کرپشن اسٹیبلشمینٹ کی طرف سے دائر مقدمات سے باعزت بری کردیا اور اعلان کیا کہ تفصیلی فیصلہ بعد میں جاری کیا جائے گا۔ پنجاب انٹی کپشن اسٹیبلشمینٹ نے منظور وٹو کے خلاف بدعنوانی کے مختلف الزمات کے تحت چھبیس اگست انیس سو اٹھانوے کو ایف آئی آر پچاس ننانوے، چوبیس ستمبر انیس سو اٹھانوے کو ایف آئی آر پچپن اٹھانوے ، دو فروری انیس سو ننانوے کو ایف آئی آر پانچ ننانوے اور اٹھائیس مئی انیس سو ننانوے کو ایف آئی آر سترہ ننانوے درج کرائی تھی۔ نو فروری انیس سو نانوے کو منطور وٹو کو انٹی کرپشن محکمہ نے گرفتار کرلیا تھا تاہم چند مہینوں بعد وہ طبی بنیادوں پر سپریم کورٹ سے ضمانت پر رہا ہوگئے تھے۔ منظور وٹو کے بیٹے معظم وٹو اور دوسرے رشتے دار مظہر وٹو، احمد شجاع وٹو اور نسیم وٹو بھی ایک مقدمہ میں شریک ملزم تھے اور وہ بھی ضمانت پر رہا ہوگئے تھے۔ ایف آئی آر پچاس ننانوے میں منظور وٹو پر بیت المال کی رقم خرد برد کا الزام لگایا گیا تھا اور انکوائری میں کہا گیا تھا کہ دو ڈرائیوروں کو بیت المال سے ایک لاکھ اور پانچ لاکھ روپے دیے گئے جبکہ وہ رقم اصل میں منظور وٹو کے رشتے داروں نے وصول کیے۔ ایف آئی آر پچپن اٹھانوے میں بھی منظور وٹو اور ان کے قریبی رشتے دار شجاع وٹو پر بیت المال سے پندرہ لاکھ روپے خرد برد کرنے کا الزمام لگایا گیا تھا اور انکوائری میں کہا گیا تھا کہ یہ رقم بظاہر ڈرائیووں میں بانٹی گئی۔ ایف آئی آر سترہ ننانوے میں منظور وٹو اور ان کے رشتے داروں احمد شجاع، لطیف وٹو وغیرہ پر ایک ملازمم نوازش علی کے نام پر بیت المال کے آٹھ لاکھ روپے خرد برد کرنے کا الزام لگایا گیا تھا۔ چوتھے مقدمہ ایف آئی آر بیس ننانوے میں منظور وٹو پر سیلاب متاثرین کی امدادی رقم سے بیس لاکھ روپے خرد برد کرنے کا الزام لگایا گیا تھا۔ ایک اور مقدمہ ایف آئی آر پانچ ننانوے میں الزمام لگایا گیا تھا کہ سابق وزیراعلی منظور وٹو وزیراعلی ہاؤس سے جاتے ہوۓ بیالیس لاکھ روپے مالیت کی اشیا اپنے ساتھ لے گۓ اور استغاثہ نے تفتیش کے دوران میں ان کے بیٹے معظم وٹو سے ایک وزیراعلی ہاؤس کا ایک گم شدہ ویڈیو پروجیکٹر برآمد کرنے کا دعویٰ کیا تھا۔ اب تقریبا پانچ سال بعد سینیئر جج انٹی کرپشن نے سابق وزیراعلی پنجاب منظور وٹو اور ان کے شریک ملزموں کو ان تمام الزمات سے بری قرار دے دیا ہے۔ | 
یہ صفحہ دوست کو ای میل کیجیئے
پرِنٹ کریں
