اخلاق احمد کراچی

باغِ قائداعظم کےوسط میں فایبر گلاس اور دھات سے بنے چاغی پہاڑ کے اس ماڈل میں اچانک آگ بھڑک اٹھی اور فائر بریگیڈ کی دو گاڑیوں کے پہنچنے سے قبل ہیں یہ یادفار تباہ ہو گئی۔

آتش زنی کی اس واردات کو بعض حلقے پاکستان کی ایٹمی پالیسی کی مخالفت کا ایک مظاہرہ قرار دے رہے ہیں۔ پولیس ذرائع کا کہنا ہے کہ اس واقعہ کے اسباب یا اس کے ملزمان کے بارے میں فی الحال کچھ نہیں کہا جاسکتا۔

یہ یادگار انیس سو ننانوے میں پاکستان کی ایٹمی دھماکوں کی پہلی سالگرہ پر کالعدم بلدیہ کراچی نے تعمیر کی تھی۔ فائبر گلاس سے بنا چاغی پہاڑ کا یہ ماڈل لوہے کے ستونوں پر نصب کیا گیا تھا۔

اس یادگار کا افتتاح اس وقت کے گورنر سندھ معین الدین حیدر نے ایک بہت بڑی تقریب میں کیا تھا۔ پاکستان ایٹمی دھماکوں کی ایسی یادگار دیگر صوبائی دارالحکومتوں میں بھی تعمیر کی گئی تھیں۔

شہری حکومت کی جانب سے کہا جا رہا ہے کہ اس یادگار میں شارٹ سرکٹ کی وجہ سے آگ نہیں لگی کیونکہ ایک سال پہلے اس یادگار کو بجلی کی فراہمی منقطع کر دی گئی تھی۔

دوسری طرف کراچی الیکٹرک سپلائی کارپوریشن کا کہنا ہے کہ یادگار کو بجلی کی فراہمی منقطع نہیں کی گئی تھی۔ تاہم یادگار کی اندرونی وائرنگ باغِ قائد اعظم کی انتظامیہ کی ذمہ داری تھی۔

باغ قائد اعظم جہاں پاکستان کے ایٹمی دھماکوں کو یہ یادگار نذر آتش ہوئی، امن واماں قائم کرنے والے ادارے پاکستان رینجرز کی ایک مرکزی عمارت کے بالکل سامنے واقع ہے۔