غوری ہٹانے پر تنازعہ  | | غوری میزائیل | |
پاکستان کے دارالحکومت اسلام آباد میں جوہری ہتھیار لے جانے کی صلاحیت رکھنے والے غوری میزائئل کے نمائشی ماڈل کو ہٹانے کے فیصلے پر تنازعہ کھڑا ہو گیا ہے۔ حکام کا کہنا ہے کہ یہ اقدام شہر کی خوبصورتی میں اضافہ کرنے کے سلسلے کا حصہ ہے اور اس کا آئیندہ ماہ اٹل بہاری واجپئی اور دوسرے جنوب ایشیائی رہنماؤں کے اسلام آباد دورے سے کوئی تعلق نہیں ۔ اس ہفتے کے شروع میں جب حکام نے شہر کے ایک بڑے چوراہے سے پاکستان کے غوری میزائیل کا ماڈل ہٹوا دیا تو اس کا ملا جلا رد عمل سامنے آیا۔ اس طرح کے ماڈل انیس سو اٹھانوے میں جوہری تجربے کے بعد ملک بھر میں نمائش کے لئے لگائے گئے تھے۔ جو لوگ پہلے ہی وسیع تباہی پھیلانے والے ہتھاروں کی نمائش کے خلاف تھے وہ اس اقدام سے مطمئن ہیں۔ دیگر لوگوں کا خیال تھا کہ ایک شاہراہ پر اس ماڈل کی موجودگی ٹریفک کے لئے ایک خطرہ تھا۔ تاہم سب سے سخت رد عمل حزب اختلاف کی جماعتوں سے آیا ہے، خاص طور پر دائیں بازو کی مذہبی جماعتوں کی طرف سے، جنہوں نے حکومت پر الزام لگایا ہے پاکستان کی جوہری طاقت کی اس علامت کو بھارتی وزیر اعظم اٹل بہاری واجپئی کو خوش کرنے کے لئے ہٹایا گیا ہے۔ واجپئی اگلے ماہ سارک اجلاس میں شرکت کے لئے اسلام آباد آ رہے ہیں۔ اسلام آباد کی سِول انتظامیہ کا کہنا ہے کہ یہ الزام بے بنیاد ہے۔ اسلام آْباد میں کیپِٹل ڈیولپمنٹ اتھارٹی (سی ڈی اے) کے سربراہ کامران لاشاری نے بی بی سی کو بتایا اس کا سارک اجلاس کے ساتھ کسی قسم کا تعلق نہیں ہے۔ انہوں نے ان اطلاعات کی تردید بھی کی کہ اس ماڈل کو تباہ کر دیا گیا ہے۔ انہوں نے کہا کہ اسے صرف شہر کی خوبصورتی بڑھانے کے پروگرام کے تحت ہٹا دیا گیا ہے۔ ان کے مطابچ جلد کسی دوسری اور بہتر جگہ لگا دیا جائے گا۔ | 
یہ صفحہ دوست کو ای میل کیجیئے
پرِنٹ کریں
