آپ کے بھائی کی دھمکی !
،تصویر کا ذریعہGetty
- مصنف, وسعت اللہ خان
- عہدہ, بی بی سی اردو ڈاٹ کام، کراچی
کراچی میں جب سنہ 1989 میں پہلی بار رینجرز کو امن و امان کے قیام میں مدد دینے کے لئے حکومتِ سندھ نے طلب کیا تو اس وقت مرکز میں بے نظیر بھٹو کی حکومت تھی اور چوہدری اعتزاز احسن وفاقی وزیرِ داخلہ تھے۔وہ دن اور آج کا دن 26 برس گذر گئے، وفاق میں 13 وزرائے داخلہ اور سندھ میں 14 حکومتیں گذر گئیں۔ مگر رینجرز کیا آئے کہ پھر نہ گئے۔ پاکستان کا کوئی اور شہر ایسا نہیں جہاں رینجرز کا اتنا طویل اور مسلسل قیام ہو۔
رینجرز کو 26 برس پہلے بلایا بھی قائم علی شاہ نے تھا اور آج بھی قائم علی شاہ ہی وزیرِ اعلیٰ ہیں مگر مجبوری یہ ہے کہ رینجرز بھلے اگلے 50 برس بھی کراچی میں رہیں پولیس کے برعکس ان کی حیثیت مہمان کی ہی رہے گی اور ان کی مدت و مینڈیٹ کا تعین بھی صوبائی حکومت ہی کرے گی۔ بھلے یہ حکومت کسی کی بھی ہو۔
جب پہلی بار رینجرز کو طلب کیا گیا تو خیال یہ تھا کہ امن و امان کی صورتِ حال بہتر ہوتے ہی انھیں اصل کام یعنی سرحدوں کی حفاظت پر بھیج دیا جائےگا۔اس دوران رینجرز کی موجودگی سے ملنے والی مہلت سے فائدہ اٹھاتے ہوئے پولیس کی تنظیمِ نو کر لی جائے گی تاکہ کل کلاں رینجرز طلب کرنے کی ضرورت ہی نہ رہے۔
لیکن آج بھی پولیس کی کم و بیش وہی حالت ہے جو 26 برس پہلے تھی۔ دونوں اداروں کا مقصد کراچی میں قیامِ امن کا حصول تھا اور ہے لیکن دونوں اداروں میں پیشہ ورانہ رابطہ کاری اور تعاون اتنا ہی ہے جتنا کسی برہمن اور ہریجن کے درمیان ہو سکتا ہے۔
ان 26 برسوں میں رینجرز کی موجودگی کے باوجود کراچی میں دس ہزار سے زائد شہری قتل ہوئے۔حالانکہ 1992 اور 1994 کے بعد کراچی اس وقت تیسرے آپریشن سے گذر رہا ہے۔ان 26 سال میں صوبہ سندھ کے بجٹ میں امن و امان کے قیام پر اگر اوسطاً دس ارب روپے سالانہ بھی خرچ ہوئے ہوں تو اس اعتبار سے اب تک کم ازکم 260 ارب روپے خرچ ہوچکے ہیں۔
مگر زمینی حقیقت یہ ہے کہ کراچی شہر کی گردن پر سے اگر موجودہ آپریشن کا گھٹنا ہٹا لیا جائے تو 24 گھنٹے بعد ہی شہر ابتری کے اسی مقام پر پہنچ جائے گا جہاں دو برس پہلے آپریشن شروع ہونے سے پہلے تھا۔
یہ بھی کمال حسنِ اتفاق ہے کہ پچھلے 26 برس میں جب بھی حکومتِ سندھ نے رینجرز کو ’ آپ کا تشریف آوری کا بہت بہت شکریہ‘ کہنے کی ٹھانی امن و امان جانے کیوں تیزی سے بگڑنے لگا اور صوبائی حکومت کو پھر گھبرا کر رینجرز کا دامن تھامنا پڑ گیا۔
،تصویر کا ذریعہAFP
اس وقت مرکز اور صوبے میں رینجرز کی اگلی قانونی مدت میں توسیع کے معاملے پر زبانی جنگ چھڑی ہوئی ہے۔ یہ توسیع ایک ہفتے پہلے ( چھ دسمبر ) کو ختم ہوچکی لہذا رینجرز اس وقت کسی قانونی چھتری کے بغیر کراچی میں متحرک ہیں۔ چونکہ اس وقت وفاقی حکومت اور عسکری قیادت ایک صفحے پر ہیں اور کراچی آپریشن کو منطقی انجام تک پہنچانے پر تلے ہوئے ہیں لہذا مرتا کیا نہ کرتا رینجرز کے مینڈیٹ میں صوبائی حکومت توسیع کر ہی دے گی۔
End of سب سے زیادہ پڑھی جانے والی
چنانچہ اس تناظر میں وفاقی وزیرِ داخلہ چوہدری نثار علی خان کی یہ دھمکی غیر ضروری ہے کہ اگر حکومتِ سندھ نے رینجرز کے قیام کی مدت میں توسیع نہیں کی تو وفاقی حکومت کے پاس اور بھی آپشنز ہیں ( یعنی گورنر راج بھی لگ سکتا ہے۔) اس دھمکی کے بعد ایک خامخواہ کی اڑچن یہ پیدا ہوگئی ہے کہ اب اگر حکومتِ سندھ فوری طور پر رینجرز کی مدتِ قیام میں توسیع کرتی ہے تو چوہدری نثار علی کہہ سکتےہیں کہ دیکھا ’ آپ کے بھائی کی دھمکی نے کام کر دکھایا۔‘
،تصویر کا ذریعہAFP
اور اگر حکومتِ سندھ 18ویں آئینی ترمیم کے تحت حاصل صوبائی خودمختاری کا مظاہرہ کرتے ہوئے اڑ جاتی ہے کہ ’یہ اختیار مہمان کو نہیں میزبان کو ہے کہ مزید کتنے دن مہمان کو برداشت کر سکتا ہے تو ہو سکتا ہے کہ اس اڑیل پن کے سبب سندھ کی حد تک تو صوبائی حکومت کی مردانگی کی وقتی واہ واہ ہوجائے مگر پھر وفاق اور صوبے کے درمیان ایک مستقل کھچاؤ کی صورت پیدا ہو سکتی ہے۔
لہذا یہ ذمہ داری اب وزیرِ اعظم نواز شریف کی ہے کہ وہ اپنے وزیرِ داخلہ کو مفت کی پوائنٹ سکورنگ سے روکیں۔ کیونکہ بات عزتِ نفس پر آجائے تو صوبہ تو صوبہ بلی بھی پنجے نکال لیتی ہے۔
مگر کراچی کا امن کیا رینجرز کی موجودگی سے ہی مشروط رہے گا ؟ اگر یہی کارِ مملکت ہے تو بے کار مملکت کیا ہوتی ہے ؟
