شمالی وزیرستان میں جیٹ طیاروں کی بمباری، ’پانچ شدت پسند ہلاک‘
،تصویر کا ذریعہPAF
- مصنف, عزیزاللہ خان
- عہدہ, بی بی سی اردو ڈاٹ کام، پشاور
پاکستان کے قبائلی علاقے شمالی وزیرستان ایجنسی میں ذرائع کے مطابق جیٹ طیاروں نے شدت پسندوں کے ٹھکانوں پر بمباری کی ہے جس میں کم سے کم پانچ شدت پسند ہلاک اور گیارہ زخمی ہوئے ہیں۔
یہ کارروائی شوال کے علاقوں واروکی منڈی اور شاہو خیل کے علاقوں میں کی گئی ہے۔ سکیورٹی ذرائع نے بتایا کہ اس کارروائی میں پاکستان فضائیہ کے طیاروں نے شدت پسندوں کے ٹھکانوں اور مشتبہ مکانات پر بمباری کی ہے۔
اس حملے میں کم سے کم پانچ شدت پسند ہلاک اور گیارہ زخمی ہوئے ہیں جبکہ تین ٹھکانوں سمیت تین گاڑیاں تباہ کر دی گئی ہیں۔
شمالی وزیرستان ایجنسی میں فوجی آپریشن ضرب عضب جاری ہے جس میں اب تک سکیورٹی فورسز کے مطابق 1500 سے زیادہ شدت پسند مارے جا چکے ہیں۔
دو روز پہلے جنوبی وزیرستان کی تحصیل تیارزہ میں شدت پسندوں نے زیارتگئی کے علاقے میں سکیورٹی فورسز کی دو چوکیوں پر چھوٹے اور بڑے ہتھیاروں سے حملہ کیا تھا جس کے بعد فورسز نے جوابی کارروائی کی۔ اس جھڑپ میں ذرائع کے مطابق سکیورٹی فورسز کے تین اہلکار ہلاک اور پانچ زخمی ہوئے جبکہ جوابی کارروائی میں چھ شدت پسند مارے گئے اور سات زخمی ہو گئے تھے۔
پاکستان کے قبائلی علاقوں اور خیبر پختونخوا کے بعض شہروں میں شدت پسندوں کی کارروائیوں میں ایک مرتبہ پھر تیزی آئی ہے۔
ٹارگٹ کلنگ کے واقعات باجوڑ ایجنسی سے لے کر جنوبی وزیرستان ایجنسی تک پیش آ رہے ہیں جبکہ ادھر خیبر پختونخوا میں بھی شدت پسندوں نے بعض مقامات پر کارروائیاں تیز کی ہیں۔
چند روز پہلے کلاچی اور ٹانک کے سرحدی علاقے میں ایف سی اور فوج کے تعمیراتی ادارے ایف ڈبلیو او کے چار اہلکاروں کو فائرنگ کرکے ہلاک کر دیا گیا تھا۔
End of سب سے زیادہ پڑھی جانے والی
