خیبر پختونخوا اسمبلی میں الطاف حسین کے خلاف قرار داد منظور
،تصویر کا ذریعہBBC World Service
پاکستان کے صوبہ خیبر پختنخوا کی اسمبلی نے ایم کیو ایم کے سربراہ الطاف حسین کی جانب سے فوج کے خلاف اشتعال انگیز بیانات پر مذمتی قراردار بھی متفقہ طور پر منظور کی ہے۔
صوبہ خیبر پختنخوا کی اسمبلی میں یہ مذمتی قرار دار پیر کو جماعتِ اسلامی کے عنایت اللہ اور پاکستان تحریکِ انصاف کے رہنما شاہ فرمان کی جانب سے پیش کی گئی۔
اس قرار داد میں حکومت سے مطالبہ کیا گیا ہے کہ پاکستان کے آئین کے آرٹیکل چھ کے تحت ایم کیو ایم کے سربراہ الطاف حسین کے خلاف غداری کا مقدمہ چلایا جائے۔
قرار داد میں مطالبہ کیا گیا ہے کہ ایم کیو ایم کے سربراہ الطاف حسین کی جانب سے قومی اداروں اور حساس معاملات کے بارے میں اشتعال انگیز بیان کا نوٹس لیا جائے۔
خیال رہے کہ ایم کیو ایم کے رہنما الطاف حسین نے جمعرات کو لندن سے اپنے ایک خطاب میں فوج کو شدید تنقید کا نشانہ بنایا تھا۔ الطاف حسین کے اس بیان پر فوج کی قیادت نے قانونی چارہ جوئی کرنے کا اعلان کیا تھا۔
End of سب سے زیادہ پڑھی جانے والی
پاکستانی فوج کے اس علان کے بعد الطاف حسین نےکہا تھا کہ اگر ان کے الفاظ سے قومی سلامتی کے اداراوں سے وابستہ افراد کی دل آزاری ہوئی ہے تو وہ معافی کے طلبگار ہیں۔
الطاف حسین نے بھارتی خفیہ ادارے ’را‘ سے مدد طلب کرنے کے بیان پر معذرت کرتے ہوئے کہا کہ اُن کی تقریر کوسیاق وسباق سے ہٹ کر پڑھا گیا ہے۔
پیر کو ہی سندھ اسمبلی میں متحدہ قومی موومنٹ کے سربراہ الطاف حسین کے خلاف قرارداد لانے کی کوشش ناکام ہو گئی، جس کے بعد ایم کیو ایم کے علاوہ دیگر اپوزیشن جماعتوں نے ایوان سے علامتی بائیکاٹ کیا۔
اس سے پہلے بلوچستان اسمبلی نے بھی الطاف حسین کے خلاف مذمتی قرارداد متفقہ طور پر منظور کی تھی۔
پاکستان کے وزیراعظم نواز شریف نے متحدہ قومی موومنٹ کے سربراہ الطاف حسین کی جانب سے فوج کے خلاف بیان بازی پر معذرت کا خیر مقدم کرتے ہوئے کہا تھا کہ قومی سلامتی سمیت حساس معاملات پر کچھ کہنے سے پہلے سوچنا چاہیے۔
نواز شریف کا کہنا تھا کہ قومی سلامتی کے اداروں کی ساکھ کا خیال رکھنا حکومتی ذمہ داری ہے۔
وزیراعظم ہاؤس سے جاری ہونے والے بیان میں کہا گیا تھا کہ قومی سلامتی کے اداروں کی ساکھ کا خیال رکھنا حکومتی ذمہ داری ہے اور اس طرح کے غیر محتاط بیانات سے قومی اداروں کا وقار مجروع ہوتا ہے۔
