پاکستانی سکولوں کے لیے گورڈن براؤن کا سکیورٹی منصوبہ

دنیا میں تعلیم کے لیے اقوام متحدہ کے ایلچی گورڈن براؤن اور پاکستانی وزیرِ اعظم نے پاکستان میں سکولوں کی حفاظت کے لیے ایک معاہدہ کیا ہے۔

سابق برطانوی وزیراعظم گورڈن براؤن نے پشاور میں آرمی پبلک سکول میں ہونے والے قتل عام کے تناظر میں ایک منصوبہ پیش کیا ہے جس میں سکولوں کے گرد پیس زون کے قیام، مسلح محافظوں کی تعیناتی، دھاتوں کی شناخت کرنے والے آلات اور ہنگامی حالت میں کام کرنے والے مواصلاتی نظام کی تنصیب کی تجاویز دی گئی ہیں۔

واضح رہے کہ پاکستان میں تعلیمی اداروں پر دنیا کے دوسرے ممالک کی نسبت کہیں زیادہ حملے ہوئے ہیں۔

گورڈن براؤن نے کہا کہ وہ ’دہشت گردوں کے حملوں کا مقابلے کرنے کے لیے سکولوں کو تیار کرنے‘ کی راہ میں تعاون کرنا چاہتے ہیں۔

ان تجاویز کے بعد گورڈن براؤن اور نواز شریف کے درمیان پاکستان میں سکولوں کے تحفظ کا معاہدہ ہوا ہے۔

خیال رہے کہ دسمبر میں پشاور میں سکول پر طالبان کے حملے میں 140 سے زیاد طلبہ مارے گئے تھے اور گذشتہ پانچ برسوں میں اسی صوبے میں سکولوں پر ایک ہزار سے زیادہ حملے ہو چکے ہیں۔

گورڈن براؤن تعلیم کے شعبے میں کام کرنے والے ایک مخیر ادارے ورلڈ ایٹ سکول کے تحفظاتی منصوبے کی تشہیر کر رہے ہیں جو پاکستان اور دیر ممالک کے جنگ زدہ علاقوں کے سکولوں کو تحفظ فراہم کرنے کے لیے تیار کیا گیا ہے۔

اس میں مقامی برادریوں اور مذہبی رہنماؤں کے ساتھ مل کر سکولوں کے گرد ’پیس زون‘ قائم کرنے کی بات کی گئی ہے۔

اس کے علاوہ سکیورٹی کے بہت سے اقدامات میں چاردیواری کی تعمیر، سکیورٹی چیک پوائنٹس اور ریزر باڑھ کی تنصیب وغیرہ شامل ہیں۔

منصوبے کے مطابق مسلح محافظین کو ان اہم مقامات پر تعینات کرنے کو کہا گیا ہے جہاں سے گردونواح پر نظر رکھی جا سکے۔ اس کے علاوہ مسلح گارڈز اور سکیورٹی سٹاف کی سخت جانچ کی بات بھی کی گئی ہے۔

اس میں سکول کے نقل و حمل کے نظام پر سخت نگرانی اور بسوں میں روزانہ دھماکہ خیز مواد کی جانچ کی بات کہی گئی ہے۔

منصوبے میں یہ بھی کہا گیا ہے کہ کسی سکول پر حملے کی صورت میں دوسرے سکولوں تک انتباہ جاری کرنے اور فوری امداد طلب کرنے کا نظام بھی نصب ہونا چاہیے۔

اس میں یہ بھی کہا گیا ہے کہ مختلف علاقوں میں موجود چھوٹے سکولوں کو ایک جگہ لایا جائے یا ایسے علاقے میں منتقل کیا جائے جہاں زیادہ حفاظتی انتظامات ہیں۔

اقوام متحدہ کے لیے عالمی سطح پر تعلیم کے سفیر مسٹر براؤن نے بین الاقوامی برادری پر سکیورٹی میں بہتری لانے کے لیے تعاون کرنے پر زور دیا ہے۔

انھوں نے کہا کہ ’ان اقدامات سے والدین اور طلبہ کی از سر یقین دہانی ہوگی کہ انتہائی پسندی کے خطروں سے نمٹنے کے لیے ہر ممکن اقدام کیا جا رہا ہے۔‘

وزیر اعظم نواز شریف کے ایک ترجمان نے بتایا کہ وزیر اعظم نے سکولوں میں بچوں کی سکیورٹی کے نظام میں بہتری لانے اور مسٹر براؤن کے ساتھ مل کر کام کرنے کے ’اپنے ذاتی عہد کا اعادہ کیا ہے۔‘