لائن آف کنٹرول پر بھارتی فائرنگ سے پاکستانی فوجی ہلاک
،تصویر کا ذریعہAbid Bhat
پاکستانی فوج کا کہنا ہے کہ کشمیر کو تقسیم کرنے والی لائن آف کنٹرول پر بھارتی فوج کی فائرنگ سے ایک پاکستانی فوجی ہلاک ہوگیا ہے۔
یہ بات فوج کے شعبۂ تعلقاتِ عامہ کی جانب سے جمعرات کی شب جاری ہونے والے ایک بیان میں کہی گئی ہے۔
بیان کے مطابق بھارتی فوج نے جمعرات کی شام ایل او سی پر پاکستان کے زیرِ انتظام کشمیر کے دارالحکومت مظفر آباد کے قریب میں پانڈو سیکٹر میں بلا اشتعال فائرنگ کی۔
آئی ایس پی آر کا کہنا ہے کہ اس فائرنگ سے ایک پاکستانی فوجی مارا گیا جبکہ پاکستانی فوج نے بھی بھارتی فائرنگ کا بھر پور جواب دیا۔
رواں ماہ پانڈو سیکٹر میں لائن آف کنٹرول پر فائرنگ کا یہ دوسرا واقعہ ہے۔ اس سے قبل آٹھ نومبر کو بھی ایسا ہی ایک واقعہ پیش آیا تھا تاہم اس میں کوئی جانی نقصان نہیں ہوا تھا۔
پاکستان اور بھارت کے درمیان ورکنگ باؤنڈری اور لائن آف کنٹرول پر حالیہ کشیدگی خاصے عرصے سے جاری ہے۔
،تصویر کا ذریعہAFP
اس دوران دونوں ملکوں کی افواج کے درمیان فائرنگ کے مختلف واقعات میں دونوں جانب سے اب تک کم از کم 19 افراد ہلاک اور 50 کے قریب زخمی ہو چکے ہیں۔
پاکستان اس معاملے پر بھارت سے سفارتی سطح پر احتجاج بھی کر چکا ہے۔
End of سب سے زیادہ پڑھی جانے والی
خیال رہے کہ حال ہی میں اپنے دورۂ امریکہ کے دوران پاکستانی فوج کے سربراہ جنرل راحیل شریف نے کہا تھا کہ لائن آف کنٹرول اور ورکنگ باؤنڈری پر بھارتی کارروائیوں کی وجہ سے پاکستان کے لیے افغان سرحدی علاقے میں شدت پسندوں کے خلاف کارروائی میں مشکلات درپیش ہیں۔
پاکستان اور بھارت کے درمیان لائن آف کنٹرول پر فائر بندی کا معاہدہ 2003 میں ہوا تھا۔
تاہم گذشتہ برس کے اواخر سے فریقین کی جانب سے ایک دوسرے پر اس معاہدے کی خلاف ورزی کے الزامات لگائے جاتے رہے ہیں۔
اس معاہدے کی خلاف ورزی کے باعث پاکستان اور بھارت کے فوجیوں کے ساتھ ساتھ سرحد پر عام آبادی بھی نشانہ بنی ہے۔
