بلوچستان میں دھماکے اور فائرنگ، چار افراد ہلاک
،تصویر کا ذریعہBBC World Service
پاکستان کے صوبہ بلوچستان کے دو مختلف علاقوں میں بارودی سرنگوں کے دھماکے اور فائرنگ کے واقعات میں ایک خاتون سمیت چار افراد ہلاک جبکہ تین زخمی ہوئے ہیں۔
بارودی سرنگ کے دھماکے کا واقعہ جمعہ کے روز ڈیرہ بگٹی میں پیش آیا۔
پولیس کے ایک اہلکار کے مطابق نامعلوم افراد نے ڈیرہ بگٹی ٹاؤن کے قریب سم سر کے علاقے میں بارودی سرنگ بچھائی تھی۔ بارودی سرنگ اس وقت پھٹ گئی جب چار افراد وہاں سے گزر رہے تھے۔
بارودی سرنگ کے دھماکے میں ایک شخص ہلاک اور تین زخمی ہوگئے۔ ہلاک ہونے والے شخص کا تعلق امن فورس سے بتایا جاتا ہے۔
دوسری جانب فائرنگ سے ہلاکتوں کا واقعہ ایران سے متصل ضلع پنجگور کے علاقے پروم میں پیش آیا۔
پنجگور میں لیویز فورس ذرائع کے مطابق اس علاقے میں نامعلوم مسلح افراد نے ایک گھر پر حملہ کیا جس کے نتیجے میں گھر کے اندر موجود ایک خاتون سمیت تین افرادہلاک ہوگئے۔
تاہم واقعے کے محرکات تاحال معلوم نہیں ہوسکے۔
دوسری جانب پنجگور سے متصل ضلع کیچ سے گذشتہ روز تین افراد کی لاشیں بھی بر آمد کی گئیں۔ ان میں سے دو افراد کی لاشیں شکرو کے علاقے سے ملیں جن کو نامعلوم افراد نے فائرنگ کر کے ہلاک کیا تھا۔
End of سب سے زیادہ پڑھی جانے والی
دونوں افراد کی شناخت ہوگئی ہے اور اس واقعے کی ذمہ داری کالعدم عسکریت پسند تنظیم بلوچستان لبریشن فرنٹ نے قبول کی ہے۔
تنظیم کے ترجمان کی جانب سے جاری ہونے والے بیان میں دعویٰ کیا گیا ہے کہ ہلاک کیے جانے والے افراد حکومتی اداروں کے لیے کام کرتے تھے۔
تیسری لاش بل نگور کے علاقے سے بر آمد ہوئی جوکہ ناقابل شناخت تھی۔
