بلوچستان میں پرتشدد واقعات معمول بنتے جا رہے ہیں
پاکستان کے صوبہ بلوچستان میں تشدد کے چار مختلف واقعات میں بلوچستان نیشنل پارٹی (مینگل) کے ایک کارکن سمیت چار افراد ہلاک ہو گئے۔
بدھ کو پنجگور میں الیکشن کمیشن کے دفتر پر دستی بم سے حملہ کیا گیا۔
بی این پی کے کارکن عبدالعزیز پرکانی پر حملے کا واقعہ کوئٹہ میں مشرقی بائی پاس کے علاقے میں پیش آیا۔
پولیس کے مطابق عبد العزیز ایک دکان پر بیٹھے تھے کہ وہاں نامعلوم موٹر سائیکل سواروں نے ان پر فائرنگ کر دی۔
فائرنگ کے نتیجے میں عبدالعزیز ہلاک ہوگئے۔
کلِک بلوچستان: 2012، بدامنی میں اضافہ ہوا
عبدالعزیز بی این پی کے مقتول سیکریٹری جنرل حبیب ایڈووکیٹ کے بھتیجے تھے۔جنہیں 2010میں نامعلوم افراد نے فائرنگ کر کے ہلاک کیا تھا۔
بی این پی کے کارکن لاش کو ہسپتال سے پریس کلب لائے اور وہاں قتل کے خلاف احتجاج کیا۔
بی این پی نے دعویٰ کیا کہ 2008 کے بعد اس کے پچاس سے زائد رہنماوں اور کارکنوں کو قتل کیا گیا ہے۔
کوئٹہ شہر میں تشدد کے ایک اور واقعہ میں سمنگلی روڈ پر ایک خفیہ ادارے کے سابق اہلکار کو ہلاک کر دیا گیا۔
کوئٹہ شہر ہی میں ایک اور واقعہ میں نامعلوم افراد نے فائرنگ کر کے ایک عالم دین کو ہلاک کر دیا۔
خضدار میں تشدد کے ایک واقعہ میں سیرت چوک پر نامعلوم افراد کی فائرنگ سے ایک شخص ہلاک ہو گیا۔
وہاں بلوچستان کے ایران سے متصل سرحدی ضلع پنجگور میں نامعلوم افراد نے دستی بم سے الیکشن کمیشن کے دفتر پر حملہ کیا۔
پولیس کی مطابق اس حملے میں کوئی جانی نقصان نہیں ہوا۔
واضح رہے کہ سال دوہزار بارہ میں بلوچستان میں امن وامان کے حوالے سے کوئی خاص تبدیلی نہیں آئی بلکہ ٹارگٹ کلنگ اور اغواء برائِے تاؤان کی وارداتوں میں اضافہ ہوا۔
بلوچستان میں سال دو ہزار تیرہ کے آغاز پر بھی پرتشدد واقعات میں کوئی کمی دیکھنے میں نہیں آئی ہے۔
