حافظ سعید پر انعام، ملک گیر احتجاج کا اعلان

دفاع پاکستان کونسل نے امریکہ کی طرف سے جماعت الدعوۃ کے سربراہ حافظ محمد سعید کی گرفتاری یا گرفتاری میں مدد کےلیے رکھے گئے انعام کی سخت الفاظ میں مذمت کی ہے اور اس کے خلاف جمعہ کے روز ملک بھر میں احتجاج کرنے کا اعلان کیا ہے۔

ادھر پاکستان کا کہنا ہے کہ وہ اس موضوع پر بحث کی بجائے عدالتی کارروائی کے لیے حافظ سعید کے خلاف ٹھوس ثبوت چاہتا ہے۔

اس موقع پر حافظ سعید نے بتایا کہ نہ امریکہ کی کسی عدالت نے ان کے خلاف فیصلہ دیا ہے اور نہ ہی ان کے خلاف امریکہ میں کوئی مقدمہ درج ہے تو امریکہ کس قانون کے تحت ان کی گرفتاری پر انعام رکھا ہے۔

دفاع پاکستان کونسل نے حکومتِ پاکستان سے حافظ سعید کو تحفظ فراہم کرنے اور صدر آصف علی زرداری سے دورۂ بھارت منسوخ کرنے کا مطالبہ کیا ہے۔

دفاع پاکستان کونسل نے جماعت الدعوۃ کے سربراہ حافظ سعید پر امریکی انعام کے خلاف راولپنڈی میں ہنگامی پریس کانفرنس کی جس میں مولانا سمیع الحق، حافظ محمد سعید، لیاقت بلوچ، شیخ رشید اور مولانا فضل الرحمان خلیل سمیت دیگر رہنماؤں سے شرکت کی۔

دفاع پاکستان کونسل کے چیئرمین مولانا سمیع الحق نے صحافیوں سے بات چیت کرتے ہوئے امریکی فیصلے کی سخت الفاظ میں مذمت کی اور اس کے خلاف احتجاج کرنے کا اعلان کیا۔

یاد رہے کہ دو دن پہلے امریکہ نے کالعدم تنظیم لشکرِ طیبہ کے بانی اور جماعت الدعوۃ کے سربراہ حافظ سعید کی تلاش میں مدد دینے پر ایک کروڑ ڈالر کا انعام مقرر کر دیا تھا۔ ان پر دو ہزار آٹھ کے ممبئی حملوں سمیت دہشتگردی کی کئی کارروائیوں میں ملوث ہونے کا شبہ ہے۔

پریس کانفرنس سے خطاب کرتے ہوئے حافظ سعید نے کہا کہ امریکہ کے اس فیصلے پر انہیں حیرانگی ہوئی کہ امریکہ کو ان کے بارے میں کوئی معلومات نہیں ہے۔

انہوں صحافیوں کو اپنے پورے پروگرام کے بارے میں بھی بتایا۔ انہوں نے امریکہ سے پوچھا کہ کس قانون کے تحت ان کی گرفتاری پر انعام رکھا گیا ہے۔

ایک سوال کے جواب میں انہوں نے بتایا کہ ’نہ تو حکومت نے مجھ سے کوئی رابطہ کیا ہے اور نہ میں نے خود حکومت سے رابطہ کیا ہے لیکن حکومت کی ذمہ داری ہے کہ وہ اپنے شہریوں کی حفاظت کے لیے امریکہ سے بات کرے۔‘

ان کے مطابق اگر امریکہ انہیں یہ انعام دیتا ہے تو پوری رقم بلوچستان کی ترقی پر خرچ کریں گے۔ انہوں بھارت پر تنقید کرنے کا موقعہ بھی نہیں گنوایا۔

امریکی انعام کے اعلان کے باوجود بھی حافظ سعید کی پاکستان میں جاری سرگرمیوں پر کوئی خاص اثر نہیں پڑا ہے اور وہ آزادی سے پورے ملک میں گھوم رہے ہیں۔