آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
برطانوی شاہی جوڑے کا دورۂ پاکستان: سوشل میڈیا پر پاکستانی صارفین کے خوش آمدید کے پیغامات
شہزادہ چارلس اور لیڈی ڈیانا کے بڑے بیٹے شہزادہ ولیم اور ان کی اہلیہ ڈچز آف کیمبرج کیٹ مڈلٹن پاکستان کا دورہ کر رہے ہیں۔
برطانوی ہائی کمشنر تھامس ڈریو نے سماجی رابطوں کی ویب سائٹ ٹوئٹر پر اپنے ویڈیو پیغام میں کہا ہے کہ برطانوی شاہی جوڑے کی پاکستان آمد دونوں ملکوں کے درمیان تاریخی تعلقات کی کڑی ہے۔
برطانوی ہائی کمشنر نے یہ بھی کہا ہے کہ برطانوی شاہی جوڑا پاکستان میں مختلف مکاتب فکر سے وابستہ افراد اور نوجوانوں سے ملیں گے جبکہ شہزادہ ولیم اور ان کی اہلیہ شہزادی کیٹ لاہور اور پاکستان کے شمالی علاقہ جات کا دورہ بھی کریں گے۔
یہ بھی پڑھیے
پاکستان میں برطانوی ہائی کمیشن نے اپنے ٹوئٹر پیج پر برطانوی جوڑے کو خوش آمدید کہنے کے لیے راولپنڈی اور لاہور میں رکشوں کو نقش و نگار، تصاویر اور عبارات سے آراستہ کرنے کی ایک ویڈیو بھی شیئر کی ہے۔
پاکستان میں سوشل میڈیا صارفین بھی اپنے اپنے انداز میں برطانوی شاہی جوڑے کو خوش آمدید کہہ رہے ہیں۔
End of سب سے زیادہ پڑھی جانے والی
وقاص احمد شائق نامی آرٹسٹ نے شہزادہ ولیم اور ڈچز آف کیمبرج کیٹ مڈلٹن کی پورٹریٹ بنانے کی ویڈیو شیئر کر کے انھیں خوش آمدید کہا ہے۔
پاکستانی کرکٹر محمد حفیظ نے لکھا کہ وہ برطانوی شاہی جوڑے کو اپنے پیارے ملک پاکستان میں خوش آمدید کہتے ہیں اور شاہی خاندان سے ملنے کے اعزاز کا انتظار کر رہے ہیں۔
ایک ٹوئٹر صارف نے لکھا ’نہیں معلوم کیوں لیکن جب سے سنا ہے کہ شاہی جوڑا پاکستان آ رہا ہے میں بہت پرجوش ہوں۔‘
لاریب نامی صارف نے تو شاہی جوڑے سے ملاقات کی خواہش کا اظہار بھی کر دیا اور لکھا ’برطانوی جوڑا لازمی طور پر یہاں گزارے جانے والے دنوں سے لطف اٹھائے گا، کاش میں ان سے مل سکوں۔‘
شاہ رخ نامی صارف نے ایک رکشے کی تصویر شیئر کرتے ہوئے لکھا ’پاکستان شاہی جوڑے کے دورے کے لیے تیار ہے۔ کچھ گھنٹے پہلے ہی اس رکشے کو راولپنڈی میں دیکھا ہے۔‘
ایک اور صارف نے لکھا ’پاکستان کو شاہی دورے سے بہت فائدہ ہو گا خاص طور پر سیاحت میں۔ مجھے امید ہے کہ دفتر خارجہ نے تمام ضروری انتظامات میں اپنا کردار ادا کیا ہے۔‘
