آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
امریکہ کے ساتھ خفیہ معلومات کا تبادلہ اور فوجی تعاون معطل کر دیا: وزیر دفاع
امریکہ کے ساتھ خفیہ معلومات کے تبادلے اور فوجی تعاون جس کے بارے میں پاکستان کے وزیر دفاع خرم دستگیر نے کہا ہے کہ اسے معطل کر دیا گیا ہے اس کو وزارتِ خارجہ کے ترجمان نے انتہائی اہم قرار دیا ہے۔
خرم دستگیر کا بیان حکومتِ پاکستان کے ٹوئٹر اکاؤنٹ سے جاری کیا گیا جبکہ امریکہ کے ساتھ فوجی تعاون اور خفیہ معلومات کے تبادلے کو پاکستان کے دفتر خارجہ کے ترجمان ڈاکٹر فیصل نے ہفتے وار بریفنگ میں انتہائی اہم قرار دیا۔
وزیرِ دفاع خرم دستگیر کا کہنا ہے کہ پاکستان نے دہشت گردی کے خلاف جنگ میں اپنی ذمہ داریاں پوری کر دی ہیں اور وہ امن کو قائم رکھنے کے لیے اپنی کوششیں جاری رکھے گا۔
دوسری جانب دفترِ خارجہ کے ترجمان ڈاکٹر محمد فیصل نے کہا ہے کہ امریکہ اور پاکستان کے درمیان تعاون خطے میں امن اور خاص طور پر افغانستان میں استحکام کے لیے بہت ضروری ہے۔
دفتر خارجہ کی ہفتے وار میڈیا بریفنگ میں ترجمان کا کہنا تھا کہ مشترکہ مفادات کے مختلف معاملات پر دونوں ملکوں کا رابطہ برقرار ہے اور یہ مختلف سطح کا رابطہ ہے۔
انھوں نے کہا کہ امریکہ کے ساتھ انٹیلیجنس معلومات کے تبادلے کی وجہ سے ہم خطے میں اپنی عملداری قائم اور القاعدہ کو تباہ کر سکے ہیں۔
تاہم ڈاکٹر فیصل کا یہ بھی کہنا تھا کہ مستقل امن کے قیام کے لیے ایک دوسرے کا احترام ضروری ہے۔
End of سب سے زیادہ پڑھی جانے والی
انھوں نے کہا کہ پاکستان گزشتہ 16 برس سے امریکہ کی ہر ممکن مدد کر رہا ہے اور خطے میں امن کے لیے اس رشتے کا قائم رہنا انتہائی اہم ہے۔
رواں ماہ کے آغاز پر امریکی محکمہ خارجہ نے کہا تھا کہ ٹرمپ انتظامیہ پاکستان کی جانب سے دہشت گردی کے نیٹ ورکس کے خلاف کارروائیاں نہ کرنے پر اس کی تقریباً تمام سکیورٹی امداد روک رہی ہے۔
یہ بھی پڑھیے
امریکی محکمہ خارجہ کا کہنا تھا کہ اس کا مقصد پاکستانی حکومت کو یہ بتانا ہے کہ اگر وہ امریکہ کے اتحادی نہیں بنتے تو معاملات پہلے کی طرح نہیں رہیں گے۔
حکومت پاکستان کی جانب سے ٹوئٹر پر جاری ہونے والے بیان کے مطابق وزیر دفاع نے امریکہ سے کہا ہے کہ وہ اہداف کو حاصل کرنے کے لیے پاکستان کے ساتھ از سرنو سٹریٹیجگ ڈائلاگ شروع کرے اور پاکستان کے خلاف دھمکی آمیز رویے سے گریز کرے۔
انھوں نے ایک بار پھر اس بات کو دہرایا کہ خطے میں سے القاعدہ کو امریکہ کے ساتھ پاکستانی تعاون کی بدولت ہی ختم کیا گیا۔
خیال رہے کہ اس قبل پاکستان کے وزیر خارجہ خواجہ آصف نے بھی امریکی جریدے وال سٹریٹ جرنل کو دیے انٹرویو میں کہا تھا کہ پاکستان کا امریکہ کے ساتھ اتحاد ختم ہو گیا ہے۔
خواجہ آصف کا کہنا تھا کہ ’ہمارا امریکہ کے ساتھ کسی قسم کا کوئی اتحاد نہیں ہے۔ اتحادی اس طرح سے پیش نہیں آتے۔‘
اس سارے معاملے کا آغاز امریکی صدر ڈونلڈ ٹرمپ کی جانب سے سال نو کے آغاز پر ہی کی جانے والی اس ٹویٹ سے ہوا تھا جس میں انھوں نے کہا تھا کہ گذشتہ ڈیڑھ دہائی میں اربوں ڈالر کی امداد لینے کے باوجود پاکستان نے امریکہ کو سوائے جھوٹ اور دھوکے کے کچھ نہیں دیا ہے۔
ان کے اس بیان کے بعد امریکہ نے پاکستان کی عسکری امداد اس وقت تک معطل کرنے کا اعلان کیا تھا جب کہ وہ اپنی سرزمین پر حقانی نیٹ ورک سمیت ان دہشت گرد گروپوں کے خلاف فیصلہ کن کارروائی نہیں کرتا جن کے خلاف کارروائی کا امریکہ خواہشمند ہے۔
