اے ٹی آر کا صدقہ

پی آئی اے ان دنوں ریڈار پر ہے اور اس کی ہر حرکت پر نظر رکھی جا رہی ہے اور اس کے طیارے میں کوئی بال برابر بھی مسئلہ نظر آئے تو میڈیا اس پر پورٹ کرتا ہے۔

اسی طرح گذشتہ دو دن سے پی آئی اے کے ایک طیارے کے سامنے بکرے کے صدقہ دینے کی تصویر خوب شیئر کی جارہی ہے۔

پی آئی اے کا یہ طیارہ اے ٹی آر کے بیڑے میں سے پہلا ہے جسے سول ایوی ایشن اتھارٹی نے تمام جانچ پڑتال کے بعد پرواز کے لیے کلیئر کیا تھا جس کے بعد مقامی انجینیئرز نے کالے بکرے کا صدقہ دیا۔

سوشل میڈیا پر جس انداز میں اس سارے معاملے کو اکثریت نے تضحیک کا نشانہ بنایا وہ تو یہاں بیان نہیں کیا جا سکتا کیونکہ اس میں عقائد اور صدقے کے حوالے سے جو باتیں کی گئیں وہ یہاں نہیں لکھی جا سکتیں مگر اس پر انجنیئرنگ کے حوالے سے دلچسپ تبصرے بھی سامنے آئے۔

ندیم فاروق پراچہ نے لکھا 'کہ اب پرواز پر مٹن ملے گا' جبکہ کرسٹین رور نے لکھا 'طیارے کے حادثے کے بعد پی آئی اے کا سٹاف کچھ بھی چانس پر نہیں کرنا چاہتا طیارے کے کلیئر ہونے کے بعد پروازوں سے پہلے کالے بکرے کا صدقہ دیا گیا ہے۔'

جب پی آئی اے کے ترجمان سے اس حوالے سے پوچھا گیا تو انھوں نے کہا کہ پی آئی اے انتظامیہ کا اس معاملے سے کوئی تعلق نہیں ہے۔ بکرا صدقہ کرنے کا عمل مقامی عملے نے اپنی ذاتی حیثیت میں کیا۔

جب ان سے پوچھا گیا کہ کیا یہ صدقہ پرواز سے قبل کیا گیا تھا تو دانیال گیلانی نے بتایا کہ 'بکرے کا صدقہ عملے نے پہلے اے ٹی آر کےشیک ڈاؤن ٹیسٹ سے کلیئر ہونے کے بعد شکرانے کے طور پر دیا، جس کے کئی گھنٹے بعد طیارے نے پہلی پرواز کی۔ اور یہ جو تاثر دیا جا رہا ہے کہ طیارے میں مسافروں کے سوار ہونے سے قبل یہ سب کچھ کیا گیا یہ بالکل غلط ہے۔ یہ صدقہ طیارے کے ہینگر کے قریب دیا گیا جو کہ ان جالیوں سے واضح ہے جو نظر آ رہی ہیں رن وے یا ٹارمیک پر ایسی جالیاں نہیں ہوتیں۔'

تاہم مذہبی رسومات کا معاملہ نیا نہیں دنیا بھر میں نئے طیاروں اور سروسز سے پہلے دعائیہ تقریبات ہوتی ہیں جن میں مذہبی شخصیات آ کر طیاروں کو آشیرباد دیتے ہیں یا دعا کرتے ہیں۔

پی آئی اے ہی کے ایک بوئنگ سیون تھری سیون طیارے کے بارے میں قصہ مشہور ہے کہ اس کو مختلف مسائل کا سامنا رہتا تھا جس کے مختلف حل سوچے گئے تبدیلیاں بھی کی گئیں اور اس سب کے ساتھ ساتھ ایک عدد بکرا طیارے کے چرنوں میں قربان کیا گیا۔ بات یہاں تک نہیں رکی بلکہ اس طیارے کی رجسٹریشن کو بھی تبدیل کیا گیا اور AP-BCE سے بدل کر AP-BFT کر دیا گیا۔

کہتے ہیں کہ اس بعد طیارے کے مسائل کافی حد تک کم ہوئے گئے اور بلآخر یہ طیارے خیروعافیت سے ریٹائر ہو گیا۔

مگر سوال یہ ہے کہ صدقے تو پہلے بھی ہوتے تھے ایسا شاید پہلی بار ہوا کہ اے ٹی آر کے صدقے کی تصویر بنا کر شیئر کی گئی اور پھر یہ میڈیا کے ہاتھ آگئی جس نے اسے ہاتھوں ہاتھ لیا۔

پی آئی اے کے ذرائع نے بتایا ہے کہ کمپنی اندرونی طور پر تحقیقات کر رہی ہے کہ کیا بکرا اور ذبح کرنے کے لیے چھری حساس مقام پر لیجانے کے لیے ضابطے کی کارروائی کی گئی یا نہیں۔'