ریاض مسرور بی بی سی اردو ڈاٹ کام، سرینگر

	جموں کشمیر میں تعینات افواج کی تعداد سال ہا سال سے ایک معمہ بنی ہوئی ہے

اس سوال پر حکمران اتحاد کی دو اہم اکائیوں، کانگریس اور پی ڈی پی، کے درمیان شدید اختلافات پیدا ہو چکے ہیں۔

انسانی حقوق کی شکایات کا جائزہ لینے کے لیئے قائم آئینی ادارہ ’سٹیٹ ہیومن رائٹس کمیشن‘ کے سربراہ ریٹائرڑ جسٹس علی محمد میر کے احتجاجاً مستعفیٰ ہو جانے سے ایوان میں جاری بحث میں مزید شدّت پیدا ہو گئی ہے۔ مسٹر میر نے الزام عائد کیا ہے کہ کمیشن کی سفارشات کو ’ردی کی ٹوکری میں ڈال دیا جاتا تھا‘۔

گزشتہ روز اسمبلی اجلاس کے دوران نائب وزیر اعلیٰ اور پی ڈی پی کے بانی راہنما مظفر حسین بیگ نے انسانی حقوق پر جاری بحث میں حصہ لیتے ہوئے کہا کہ ’جموں کشمیر میں چھ لاکھ سے زائد فوج ہے اور اس میں سب کے سب فرشتے تو نہیں ہونگے۔ کچھ غلط عناصر بھی ہوتے ہیں جن کے ہاتھوں حقوق کی خلاف ورزی ہوتی ہے‘۔

دوسرے روز وزیر اعلیٰ غلام نبی آزاد نے اس خیال کی یوں تردید کی: ’افواج کی تعداد کے بارے میں مبالغے سے کام لیا جارہا ہے۔ ریاست میں صرف چار ڈویژن فوج ہے، تین ڈویژن جموں صوبے میں اور ایک کشمیر میں ہے۔ فوجیوں کی تعداد ایک لاکھ ہے جبکہ پولیس اور نیم فوجی عملے کی مجموعی تعداد ایک لاکھ پانچ ہزار ہے۔ اس طرح کل ملا کر دو لاکھ پانچ ہزار فوج ہے‘۔ انہوں نے کہا کہ ’افسوس ہے کہ مبالغہ آمیز اعداد و شمار اسمبلی سے جاری ہوتے ہیں‘۔

دو لاکھ، چھ لاکھ یا پانچ لاکھ  ’کشمیر میں صرف دو لاکھ پانچ ہزار فوجی ہیں، تعداد کو بڑھا چڑھا کر پیش کیا جاتا ہے‘: غلام نبی آزاد۔ ’ریاست میں چھ لاکھ سے زائد فوجی ہیں، وہ سب فرشتے نہیں۔ ان میں غلط عناصر بھی ہوتے ہیں جو زیادتیاں کرتے ہیں‘: نائب وزیر اعلیٰ مظفر حسین بیگ ’کشمیر میں ہر پانچ قدم پر مورچہ ہے، پانچ لاکھ فوجی موجود ہیں‘، صحافی اور حقوق انسانی کے رضاکار گوتم نو لکھا

حریت کانفرنس کے ترجمان نعیم احمد خان نے بی بی سی کو بتایا کہ ’ کشمیر میں فوج، نیم فوجی دستوں، فوج کی سرپرستی میں سرگرم مسلح دیہی دفاعی کمیٹیوں اور دیگر مسلح افراد سمیت کل دس لاکھ سے زائد ہتھیاربند سپاہی میں موجود ہیں‘۔

عالمی شہرت یافتہ خاتون ارون دھتی رائے اور حقوق انسانی کے رضاکار گوتم نولکھا جیسے ہندوستانی دانشوروں نے اپنی تحریروں میں کشمیر میں تعینات انڈین افواج کی تعداد پانچ لاکھ سے زائد بتائی ہے۔

	دیڑھ سے دو ہزار کے درمیان ملیٹنٹ ہیں تو پانچ لاکھ انڈین افواج کیا کر رہے ہیں۔

اگر نئی دلّی نے کبھی کشمیر میں فوجی تعیناتی کی تفصیلات جاری نہیں کی ہیں تو پھر ان اندازاوں کی بنیاد کیا ہے؟ اس سوال کے جواب میں ہندوستانی صحافی اور رضاکار گوتم نو لکھا نے بی بی سی کو نئی دلی سے فون پر بتایا، ’ کئی سال تک میں اخباروں میں فوج اور نیم فوجی دستوں کے سربراہوں کے بیانات ریکارڑ کرتا رہا ہوں۔ ان معلومات کی بنا پر میں کہتا ہوں کہ مظفر بیگ سچ کے زیادہ قریب ہیں اور وزیر اعلی کے بیان کی صحت مشکوک ہے۔ کشمیر میں تو ہر پانچ قدم پر مورچہ ہے۔ وہاں تو صرف راشٹریہ رائفلز کی تعداد ستّر سے اسّی ہزار کے بیچ ہوگی اور یہ فورس فوج کا حصہ ہے نہ نیم فوج کا‘۔

ارون دھتی رائے پانچ لاکھ بتاتی ہیں  عالمی شہرت یافتہ خاتون ارون دھتی رائے اور حقوق انسانی کے رضاکار گوتم نولکھا جیسے ہندوستانی دانشوروں نے اپنی تحریروں میں کشمیر میں تعینات انڈین افواج کی تعداد پانچ لاکھ سے زائد بتائی ہے

۔ ۔ ۔ فوج کو نکالا جائے  ریاست کی سب سے بڑی اور پرانی ہندنواز جماعت نیشنل کانفرنس یا این سی کے صدر نے پاکستانی دورے سے واپسی کے بعد کئی مرتبہ یہ مطالبہ دوہرایا ہے کہ آبادی والے علاقوں سے فوج کو نکالا جائے

پی ڈی پی کے اس سٹینڈ سے مخلوط سرکا ر کے اندر اکثر کشیدگی رہی ہے اور اکائیوں کے تعلقات میں آج بھی خاصا تناؤ پایا جاتا ہے۔

مبصرین کہتے ہیں کہ اسمبلی ہال میں پی ڈی پی کے بانی رہنما اور نائب وزیر اعلی مظفرحسین بیگ کے بیان کو وزیراعلٰی کی طرف سے ’مبالغہ‘ قرار دینا اس تناؤ میں اضافہ کر سکتا ہے۔