حماس کی کامیابی کے بعد سے اس کے اور الفتح کے درمیان کشیدگی پائی جا رہی ہے

حکومت نے نچلے درجے کے تقریباً چالیس ہزار ملازمین سے کہا کہ وہ بینک جا کر ایک مہینے کی تنخواہ وصول کر سکتے ہیں۔ اس اعلان کے بعد بینکوں کے سامنے قطاریں لگنا شروع ہو گئیں۔

حماس کی حکومت مارچ میں اسرائیل، یورپ اور امریکہ کی طرف سے اقتصادی پابندیوں کے بعد سے ملازمین کو تنخواہیں نہیں دے سکی تھی۔ فلسطینی انتظامیہ کی حکومت کے خلاف یہ پابندیاں حماس کو اسرائیل کو تسلیم کرنے اور تشدد ترک کرنے پر مجبور کرنے کے لیئے کیئے گئے تھے۔

تشدد
خان یونس میں ہونے والے تشدد کے واقعے میں حماس کے ایک رکن کی گاڑی پر اس وقت فائرنگ کی گئی جب وہ اپنے خاندان کے افراد کے ساتھ سفر کر رہے تھے۔

اس حملے میں ایک حاملہ عورت سمیت دو افراد ہلاک ہوئے۔ حماس نے اس کی ذمہ داری اس سیکیورٹی فورس پر عائد کی ہے جو اس کی مخالف جماعت الفتح کے قریب سمجھی جاتی ہے۔

غزہ شہر میں ایک مختلف واقعے میں تین مزید افراد کو ہلاک کر دیا گیا۔ ابتدائی طور پر یہ واضح نہیں ہو سکا کہ حملے کے پیچھے کون تھا اور یہ واقعہ کیوں پیش آیا؟ یہ واقعہ اس جگہ قریب پیش آیا جہاں کچھ روز قبل ہلاک ہونے والے سیکیورٹی افسر کا سوگ منایا جا رہا تھا۔

ہلاک ہونے والے افسر کے ساتھیوں نے ان کی ہلاکت کے لیئے حماس کو ذمہ دار ٹھہرایا ہے۔

جنوری میں انتخابات میں حماس کی کامیابی کے بعد سے اس کے اور سابقہ حکومت میں شامل جماعت الفتح کے درمیان کشیدگی بڑھتی جا رہی ہے۔