’قیدیوں سے ملاقات ریڈ کراس کا کام ہے‘

اقوام متحدہ نے تین سال قبل خلیج گوانتانامو کے قید خانے کو کھولے جانے کے فوراً بعد اس کے معائنہ کی درخواست کی تھی۔

پینٹاگن کے اعلان کے مطابق اقوام متحدہ کے تین اہلکاروں کو قید خانے کے معائنہ کرنے اور وہاں تعینات فوجی حکام سے بات چیت کرنے کی اجازت ہوگی لیکن انھیں قیدیوں سے ملاقات کرنے اور سوالات کرنے نہیں دیا جائے گا۔

انسانی حقوق کے لیے کام کرنے والی عالمی تنظیمیں خیلج گوانتانامو کے اس قید خانے اور اس میں قیدیوں کے ساتھ روا رکھے جانے والے سلوک پر تشویش کا اظہار کرتی رہی ہیں۔

خلیج گوانتانامو میں پانچ سو پانچ کے قریب لوگ قید ہیں جن میں سے زیادہ تر کو افغانستان میں حملے کے دروان القاعدہ تنظیم سے تعلق کے شبہے میں گرفتار کیا گیا تھا۔

پینٹاگن کے ترجمان لیفٹنینٹ کرنل مارک بلیسٹروس نے کہا کہ اقوام متحدہ کے اہلکاروں کو قیدیوں سے ملاقات کی اجازت اس لیے نہیں دی گئی کیونکہ یہ کام عالمی ریڈ کراس کی تنظیم کا ہے۔