جوہری توانائی بنانے کی صلاحیت حاصل کرنا ہمارا حق ہے: ایران

اقوام متحدہ کے جوہری توانائی کے ادارے آئی اے ای اے کی قرار داد میں ایران کے جوہری پروگرام کا معاملہ اقوام متحدہ کی سکیورٹی کونسل کے سپر د کرنے کو کہا گیا ہے۔ اس ضمن میں کسی تاریخ کا اعلان نہیں کیا گیا۔

بش انتظامیہ کے ایک عہدے دار نے قرارداد کو ایرانی جوہری حکمت عملی کے لیے ایک دھچکا قرار دیا ہے اور کہا ہے کہ اس سے ایران کو تنہا کرنے میں مدد ملے گی۔

قرارداد میں ایران سے مطالبہ کیا گیا ہے کہ وہ یورینیئم کی افزودگی معطل کر دے اور اقوام متحدہ کے معائنہ کاروں کو اپنی تنصیبات تک رسائی فراہم کرے۔

ایجنسی کے ایک ترجمان کےمطابق اس قرارداد کے حق میں بائیس ووٹ پڑے اور مخالفت میں ایک ووٹ آیا جبکہ بارہ ارکان نے ووٹ نہیں ڈالا۔

آئی اے ای اے کے سربراہ محمد البرادئی نے کہا ہے کہ قرار داد میں سفارتکاری کو ایک موقع دینے کی گنجائش چھوڑی گئی ہے۔

دوسری طرف ایران کے مرکزی نمائندے جواد واحدی نے کہا ہے کہ فیصلہ امریکہ اور برطانیہ کی طرف سے ڈالے گئے سخت سیاسی دباؤ کے تحت لیا گیا ہے۔

ماہرین کے مطابق قرارداد میں تاریخ کا تعین نہ کرکے ایران کو معاملات درست کرنے کا راستہ دیا گیا ہے۔

عالمی امور کے ماہر حسن عسکری رضوی کے مطابق کچھ ممالک ایران کے جوہری پروگرام کے معاملہ کو سلامتی کونسل میں نہیں لے جانا چاہتےاور تاریخ مقرر نہ کرنے کا مطلب اس کو ’مثبت اقدام‘ کرنے کا وقت دینا ہے۔