اعجاز مہر بی بی سی اردو ڈاٹ کام، اسلام آباد

القاعدہ سے خطرے کی نوعیت آئرش رپبلکن آرمی سے لاحق خطرے سے مختلف ہے: سر جان

منگل کے روز بی بی سی سے بات کرتے ہوئے انہوں نے تصدیق کی کہ گرفتار ہونے والا شہزاد نامی شخص برطانوی شہری ہے اور ان سے مزید پوچھ گچھ جاری ہے۔

پاکستان کے صوبہ سرحد کے دارالحکومت پشاور سے پینتیس کلومیٹر کے فاصلے پر واقع شب قدر کے علاقے میں چھاپہ مار کر پیر کی رات کو گرفتار کیا گیا تھا۔

گرفتار ہونے والے شخص کے قبضہ سے ,ٹیلی فون ڈائری، کمپیوٹر اور کچھ ’سی ڈیز، بھی برآمد کی گئیں ہیں۔

شہزاد کے بارے میں بتایا جاتا ہے کہ وہ صوبہ سندھ کے شہر حیدرآباد سے تقریباً ایک ماہ قبل شب قدر کے علاقے میں آیا اور مکان کرائے پر لیا تھا۔

چارسدہ کے قریب واقع علاقے شب قدر کے مقامی لوگوں کا کہنا ہے کہ متعلقہ شخص زیادہ تر عرصہ گھر کے اندر کمپیوٹر پر ہی گزارتا تھا اور باہر کبھی کبھار نکلتا تھا۔

یہ تو تاحال واضح نہیں کہ شہزاد کی گرفتاری حال ہی میں مردان سے پکڑے جانے والے القاعدہ کے سرکردہ رہنما ابو الفراج اللبی سے حاصل ہونے والی معلومات کا نتیجہ ہے یا نہیں۔

لیکن حکام کا کہنا ہے کہ اللبی کی گرفتاری کے بعد صوبہ سرحد کے چھوٹے قصبوں تک سیکورٹی ایجنسیز نے نظرداری کرنا شروع کردی ہے۔