 |  غربِ اردن میں زیر ِتعمیر باڑ کا نیا نقشہ تیار کیا گیا ہے۔ |
اسرائیل کی وزارت دفاع نے کہا ہے کہ غربِ اردن میں تعمیر ہونے والی باڑ کا نیا نقشہ تیار ہو چکا ہے۔ اسرائیلی ہائی کورٹ نے فیصلہ دیا تھا کہ غربِ اردن میں زیر تعمیر باڑ کے نقشے سے متعلق منصوبوں میں مزید بہتری لانی ہوگی تاکہ فلسطینی عوام کو مشکلات کا سامنا نہ کرنا پڑے۔ لیکن باڑ کے نئے نقشہ پر عمل کرنے کے لیے اسرائیل کے وزیرِاعظم ایریل شیرون کی منظوری باقی رہ گئی ہے۔ عالمی عدالت انصاف نے بھی قرار دیا ہے کہ یہ باڑ غیر قانونی ہے۔ اس باڑ کو وہاں سے ختم کر دینا چاہیے جہاں سے اس کی حد فلسطین کی سرزمین سے شروع ہوتی ہے۔ مقدمہ اس باڑ سے متاثر ہونے والے چند فلسطینی شہریوں نے درج کیا تھا۔ ان کا کہنا تھا کہ اس باڑ کے بننے سے دس مختلف گاؤں میں تقریباً پینتالیس ہزار فلسطینی بری طرح متاثر ہوں گے کیونکہ وہ اپنے سکولوں، زرعی زمینوں اور نوکریوں سے بالکل کٹ جائیں گے۔ اس سلسلے میں فلسطین کی کابینہ کے وزیر صاحب ایریکت نے باڑ سے متعلق شدید ردعمل کا اظہار کیا ہے۔ اس سلسلے میں فلسطینی حکام کا کہنا ہے کہ اسرائیل کا باڑ لگانے کا اصل مقصد فلسطینی زمین کو آہستہ آہستہ مزید اپنے حصے میں شامل کرنا ہے۔ اسرائیلی وزارت دفاع کا کہنا ہے کہ باڑ سے متعلق نیا نقشہ اس وقت تک نہیں شائع نہیں ہوگا جب تک اسرائیلی وزیرِ اعظم ایریل شیرون اس کی منظوری نہیں دے دیتے۔ | 
یہ صفحہ دوست کو ای میل کیجیئے
پرِنٹ کریں
