عدنان عادل بی بی سی اردو ڈاٹ کام، لاہور

لاہور ائرپورٹ پر کرفیو جیسا سماں تھا۔

ہندوستان کے کھلاڑیوں نے گہرے نیلے رنگ کے سوٹ پہنے ہوۓ تھے اور خوش نظر آرہے تھے۔ ان کو ائر پورٹ سے باہر نکالنے کے لیے آمد کی بجاۓ روانگی کا دروازہ استعمال کیا گیا۔

چودہ برس بعد پاکستان آنے والی پندرہ کھلاڑیوں کی اس ہندوستانی ٹیم کی قیادت سارو گنگولی کررہے ہیں جن کا لاہور ائر پورٹ پر لاہور کے ضلعی رابطہ آفیسر (ڈی سی او) محمود اور پاکستان کرکٹ کنٹرول بورڈ کے چیف ایگزیکٹو رمیض راجہ اور دوسرے اہلکاروں نے کھلاڑیوں کا استقبال کیا اوران کو پھولوں کے پہناۓ۔

لاہور پہنچنے سے پہلے انڈین ٹیم نے وزیراعظم واجپائی سے ملاقات کی۔

لاہور ائر پورٹ پر پولیس کے سپاہیوں سے بھر اور کالی وردی میں ملبوس ایلیٹ فورس کی دس گاڑیوں کا ایک کارواں تیار کھڑا تھا جو کھلاڑیوں کے لے جانے کے لیے لائی گئی دو کوچز کے آگے پیچھے چلتا ہوا انھیں ہوٹل تک لے کر گیا۔

ایک کوچ میں ہندوستان کے کھلاڑی اور دوسری میں کرکٹ بورڈ کے حکام سوار تھے۔

آج صبح ہی سے لاہور ائرپورٹ سے لے کر پرل کانٹی نینٹل ہوٹل تک پولیس تعینات کردی گئی تھی اور جس راستے سے ٹیم کو ہوٹل لے جایا جاۓ گا اس کے دونوں طرف پولیس کے سپاہی پہرہ دے رہے تھے جیسا کہ کسی سربراہ مملکت کی آمد پر کیا جاتا ہے اور راستے میں پولیس کی گاڑیاں گشت کررہی ہیں۔

کھلاڑیوں کی آمد پر ائر پوٹ پر ملکی اور غیر ملکی صحافیوں کی بڑی تعداد موجود تھی جنھیں کرکٹ کنٹرول بورڈ نے کوریج کے لیے مخصوص کارڈز جاری کیے ہیں۔

ہندوستانی کھلاڑی شام چار بجے ہوٹل میں جہاں ان کی رہائش ہے ایک پریس کانفرنس سے خطاب کریں گے۔ اس کے بعد ہندوستانی ٹیم قذافی اسٹیڈیم میں مشق کرے گی۔

ہندوستان کی ٹیم لاہور میں گیارہ مارچ کو ایک دن رات کا پریکٹس میچ کھیلے گی اس کے بعد تیرہ مارچ کو کراچی میں پہلا ایک روزہ میچ ہوگا۔ ٹیم پاکستان میں چالیس روز تک رہے گی اور پانچ ایک روزہ اور تین ٹیسٹ میچ کھیلے گی۔

ہندوستانی ٹیم نے دیلی سے روانہ ہونے سے پہلے ہندوستان کے وزیراعظم اٹل بہاری واجپائی سے ملاقات کی اور انہیں اپنے دستخطوں والا ایک بیٹ پیش کیا۔