یہ صفحہ دوست کو ای میل کیجیئے		پرِنٹ کریں

یاسر عرفات کے حمایتی

امریکہ نے اسرائیل کی حمایت میں اقوام متحدہ کی سلامتی کونسل میں اس مسودے کے خلاف ویٹو کا استعمال کیا ہے جس میں اسرائیل سے کہا گیا تھا کہ فلسطینی رہنما یاسر عرفات کی ملک بدری کا فیصلہ ترک کردے۔

سلامتی کونسل میں یہ قرارداد شام اور سوڈان کی جانب سے پیش کی گئی تھی۔ اس قرارداد کے حق میں گیارہ ممالک نے ووٹ دیے جبکہ برطانیہ، جرمنی اور بلغاریہ نے رائے شماری میں حصہ نہیں لیا۔ سلامتی کونسل میں پندرہ ارکان ہیں۔

اس قرارداد میں کہا گیا تھا کہ اسرائیل ایک ’قابض طاقت‘ ہے اور اقوام متحدہ اس سے ’مطالبہ کرتا ہے کہ فلسطینی انتظامیہ کے منتخب صدر کی ملک بدری کی کوششیں ترک کردے اور ان کو دھمکیاں دینے سے باز رہے۔

قرارداد پر رائے شماری کے بعد اقوام متحدہ میں امریکی سفیر جان نیگرو پونتے نے کہا کہ ویٹو کا استعمال اس لئے کرنا پڑا کیونکہ حماس اور الاقصیٰ بریگیڈ جیسی شدت پسند تنظیموں کا ذکر نہیں تھا۔ نیگروپونتے نے کہا: ’فلسطینی انتظامیہ کو دہشت گرد گروہوں کے خاتمے کے لئے اقدام کرنا ہوگا۔‘

عرفات کے حق میں ریلی

برطانیہ نے جو اس وقت سلامتی کونسل کا سربراہ ہے، قرارداد میں قیام امن کے نقشۂ راہ کو حقیقت میں تبدیل کرنے کے لئے کچھ ترامیم پیش کیں جنہیں شام نے مسترد کردیا۔

منگل کے روز اسرائیلی حکومت نے فلسطینی انتظامیہ کی اس پیش کش کو سیاسی چال کہتے ہوئے مسترد کردیا جس میں خطے میں فوری طور پر فائربندی کی تجویز پیش کی گئی تھی۔ غیر معینہ مدت کیلئے فائربندی کی یہ پیش کش یاسر عرفات کے مشیر جبریل رجوب کی جانب سے کی گئی تھی۔

حال ہی میں خودکش حملوں کے جواب میں اسرائیلی کابینہ نے فیصلہ کیا ہے کہ فلسطینی رہنما یاسر عرفات کو ملک بدر کردیا جائے گا۔ اسرائیلی نائب وزیراعظم نے یہ بات بھی کہی ہے کہ عرفات کا قتل کیا جاسکتا ہے۔