یہ صفحہ دوست کو ای میل کیجیئے		پرِنٹ کریں

عرفات کو ہٹانے کے اسرائیلی فیصلے پر فلسطینی مشتعل ہیں

اقوامِ متحدہ کی سلامتی کونسل میں منگل کے روز فلسطینی رہنما یاسر عرفات کو ہٹائے جانے کے اسرائیلی فیصلے پر رائے دہی ہوگی۔

یہ رائے دہی اسرائیلی اور فلسطینی سفارتکاروں کے درمیان اس معاملے پر بحث مباحثے کے ایک روز بعد کی جا رہی ہے۔

اقوامِ متحدہ میں اسرائیل کے سفیر ڈان گلرمین نے پیر کے روز اپنی تقریر میں یاسر عرفات کی مذمت کی تھی اور انہیں بین الاقوامی دہشت گرد قرار دیا تھا۔

اس بیان پر رِ عمل کے طور پر فلسطینی سفارتکار اجلاس سے واک آؤٹ کر گئے تھے۔

یاسر عرفات کو ملک بدر کرنے کے فیصلے کا اعلان اسرائیل کی کابینہ نے گزشتہ جمعرات کو کیا تھا جس کے بعد اسرائیل کے نائب وزیر اعظم عہود المارت نے انکشاف کیا کہ یاسر عرفات کو قتل کرنے کی ایک تجویز پر بھی کابینہ میں غور کیا گیا تھا۔

اس فیصلے کے بعد اسرائیل کو شدید مذمت کا سامنا ہے۔

اجلاس میں فلسطینی نمائندے نے ڈان گلرمین کی تقریر کو ’بے کار‘ قرار دیا۔

شام کی جانب سے پیش کی گئی قرار داد میں یہ مطالبہ کیا گیا ہے کہ اسرائیل یاسر عرفات کو نہ تو کوئی نقصان پہنچائے اور نہ ہی انہیں ملک بدر کرے۔

امریکہ کا کہنا ہے کہ وہ قرارداد کو موجودہ حالت میں قبول کرنے کے لئے تیار نہیں ہےکیونکہ اس میں فلسطینیوں کی جانب سے کی جانے والی کارروائیوں کی مذمت نہیں کی گئی ہے۔

شام پہلے ہی اس قرار داد میں کچھ ردو بدل کرچکا ہے تاکہ امریکہ کی جانب سے اس قرار داد کے ویٹو کئے جانےکے امکان کو نظر انداز کیا جاسکے۔

اب اس قرارداد کے متن میں اسرائیلی کارروائیوں کے ساتھ ساتھ فلسطینی خودکش حملہ آوروں کی بھی مذمت کی گئی ہے۔