وسعت اللہ خان بی بی سی اردو ڈاٹ کام

	’پوتن کی جمہوریت کش پالیسیوں سے صرف روس متاثر ہورہا ہے جبکہ امریکی پالیسی سے پوری دنیا متاثر ہورہی ہے‘

امریکی حکومت نے اپنے ردِ عمل میں اگرچہ ولادی میر پوتن کے مایوس کن جمہوریت کُش ریکارڈ کا حوالہ دیا ہے لیکن مسئلہ یہ ہے کہ پوتن کی جمہوریت کش پالیسیوں سے صرف روس متاثر ہورہا ہے جبکہ امریکی پالیسی سے پوری دنیا متاثر ہورہی ہے۔

سرد جنگ کے خاتمے کے بعد بیشتر کو توقع تھی کہ سپر پاورز کی کشاکش سے آزاد ہونے کے بعد عالمی فوجی بجٹ میں کمی آ جائے گی اور دنیا ایک طویل وقفے کے بعد امن اور جمہوری اقدار کی جانب لوٹ جائے گی۔کیونکہ امریکہ جس نے پچاس برس تک سوویت آمرانہ نظام کے مقابلے میں فروغِ جمہوریت کا جھنڈا بلند کئے رکھا ۔نئی دنیا میں وہ ایک زمہ دار واحد سپر پاور کا کردار نبھائے گا۔

چنانچہ اس حیثیت میں امریکہ چاہتا تو اب سے دس برس پہلے ہی اسرائیل فلسطین تنازعہ منصفانہ طریقے سے حل کروا کے عرب حکمراں طبقے کے ساتھ ساتھ مشرقِ وسطی کے عوام کا دل بھی جیت لیتا اور یوں القاعدہ کے لئے عام آدمی کا دل تنگ ہوجاتا۔

امریکہ چاہتا تو بطور واحد سپر پاور اسرائیل کا ایٹمی پروگرام رول بیک کروا کے ہندوستان، پاکستان، شمالی کوریا اور اب ایران کے ایٹمی ایجنڈے کو پراثر انداز میں اخلاقی جواز سے محروم کرسکتا تھا۔

صدام حسین کے وسیع تر تباہی والے افسانوی ہتھیاروں کے جواز کو عراق پر حملے کے لئے استعمال نہ کرکے امریکہ نہ صرف نائن الیون کے واقعات سے پیدا ہونے والی عالمی ہمدردی برقرار رکھ سکتا تھا بلکہ دہشت گردی کے خلاف عالمی جنگ میں اپنی نیت پر اٹھنے والے سوالات سے بھی محفوظ رہ سکتا تھا۔

امریکہ چاہتا تو بین الاقوامی جرائم کی سماعت کی مستقل عالمی عدالت کے تصور کی حمایت کرکے، اپنے فوجیوں کو جنگی جرائم کے الزامات سے مستسنیٰ رکھنے کی ضد نہ کرکے اورگوانتا نامو جیسے قید خانے قائم نہ کرکے اس دنیا میں تاریک قوتوں کے خلاف انسانی حقوق کے قوانین کا طاقتور پشت پناہ ثابت ہو سکتا تھا۔

اگر امریکہ عالمی ماحولیاتی آلودگی میں کمی کے کیوٹو سمجھوتے کی حمایت کردیتا تو پھر چین سمیت تیز رفتار اندھا دھند صنعت کاری کے ذمہ دار ترقی پزیر اور ترقی یافتہ ممالک سے کرہ ارض کو آلودگی سے پاک کرنے کی ٹھوس ضمانتیں حاصل کرنا زیادہ مشکل نہ ہوتا۔

جو کچھ ولادی میر پوتن نے کہا اس میں کچھ بھی نیا نہیں ۔اقوامِ متحدہ کے سابق سکریٹری جنرل کوفی عنان بھی اپنے الوداعی کلمات میں کہہ چکے ہیں کہ موجودہ امریکی پالیسیوں سے دنیا پہلے کے مقابلے میں مزید غیر محفوظ ہوگئی ہے۔خود امریکی عوام پچھلے نومبر میں کانگریس کے انتخابات میں بذریعہ بیلٹ موجودہ خارجہ پالیسی پر عدم اعتماد کرچکے ہیں۔

اتنے جھٹکے کھانے اور باتیں سننے کے باوجود واشنگٹن انتظامیہ اس مصرعے کو مسلسل اپنی گلوبل پالیسی کا محور بنائے ہوئے ہے۔
سنجیاں ہو جان گلیاں تے وچ مرزا یار پھرے