منظور اعجاز واشنگٹن، امریکہ

صدر بش کے خطاب سے یہ بھی واضح ہوگیا کہ سال میں ایک دفعہ اجتماعی کھالیں جمع کرنے والے ملکوں میں سے کچھ کو تو آزادی کی اتنی ہی ضرورت ہے جتنی کیوبا یا شمالی کوریا کو ہے یا دیوار برلن گرنے سے پہلے مشرقی یورپ کے ملکوں کو تھی۔ کھالوں کا مسئلہ اتنا اہم نہ ہوتا تو بڑے بڑے لیڈر اور حکومت پاکستان کے ذمہ دار وزیر اس کے لئے اتنے لمبے چوڑے ضابطے نہ بناتے۔ صدر بش بھی یہی کہہ رہے ہیں کہ دنیا میں جو کھالیں اتار سکتا ہے یا جمع کرسکتا ہے اس کو اس کی پوری آزادی ہونی چاہئے۔

صدر بش کی رسم حلف اور آزادی پر خطبے کے لیے واشنگٹن ایک ایسا قلعہ بن گیا تھا جس پر دشمن کسی وقت بھی حملہ کر سکتا ہے۔ ہر سڑک اور عمارت پر سنسر لگے ہوئے، پولیس اور فوج کے پہرے میں جکڑی ہوئی یخ بستہ سڑکیں، چاروں اور دشمن کے جہاز گرانے کے لئے میزائل چوکس ، فضا کو مزید ہیبت ناک بنانے کے لئے فضا میں گردش کرتے ہیلی کاپٹر اور جنگی طیارے۔ قطار اندر قطار فوجی بینڈ باجوں کے دستے!

صدر بش کی دنیائے عالم میں آزادی پھیلانے اور جبرواسبتداد ختم کرنے کے روح ہلا دینے والے خطاب سے پہلے نائب صدر ڈک چینی ٹریلر چلا چکے تھے۔ انہوں نے ایم ایس این بی سی کو انٹرویو دیتے ہوئے کہا تھا کہ ایران کا نیوکلیر پروگرام بہت سرگرم ہے اور ایران وہ ملک ہے جو دنیا میں سب سے زیادہ دہشت گردی پھیلانے والا ملک ہے۔ اس کے بعد صدر بش کے خطاب کے اصل معانی سمجھنا کچھ مشکل نہیں ہونا چاہیے تھا۔

صدر بش کی تقریر کا واضح پیغام یہ تھا کہ امریکہ پری ایمپٹِو وار یا حفظ ماتقدم کی جنگ کی پالیسی جاری رکھتے ہوئے دوسرے ملکوں پر حملے کا حق استعمال کرتا رہے گا۔ لہذا امریکی عوام کو مستقبل کی جنگوں کے لئے تیار رہنا چاہیے۔ ان کی تقریر میں آزادی کے لفظ کا بکثرت استعمال تو اور بھی خوفناک تھا کیونکہ اس کی تکرار سے اندازہ ہوتا تھا کہ وہ کتنی شد و مد سے امریکی عوام کو مستقبل قریب کی جنگ کے لئےتیار کر رہےہیں۔

امریکی عالمی پالیسی کے طالب علموں کے لیے صدر بش کی تقریر کوئی معمہ نہیں ہونا چاہئیے۔ جب امریکہ کا مقابلہ کمیونسٹ ملکوں کے ساتھ تھا تو اس وقت بھی امریکی رہنما اس طرح کے بڑے بڑے دعوے کیا کرتے تھے لیکن ان سب کی نظر میں آزادی کےحق دار سرخ ملکوں کے شہری ہی ہوا کرتے تھے۔ ساری تقریریں انہی کو ترغیب دینے کے لئے ہوتی تھیں کہ وہ کسی بھی طرح بھاگ کر امریکہ آجائیں جہاں ان کو گرین کارڈ اور دوسری سہولتیں فورا فراہم کی جاتی تھیں۔

اسی زمانے میں دنیا میں بد ترین فوجی آمریتیں قائم تھیں جن میں اکثریت امریکہ کی اتحادی تھیں اور کچھ تو قائم ہی ڈالر اور امریکی فوج کی مدد سے ہوئی تھیں۔ جنوبی اور لاطینی امریکہ کا تقریبا سارا براعظم سی آئی اے کی معاونت سے فوجیوں کے قبضے میں تھا، یہی حال افریقہ اور ایشیا کا تھا۔ جنوبی کوریا سے لے کر پاکستان اور ایران تک بوٹوں والی سرکاریں یا پھر بادشاہ اور شیوخ تھے اور یہ سب امریکہ کے چہیتے تھے۔ ان میں ایران جیسے ملکوں میں تو سی آئی اے نے پروان چڑھتی جمہوریت کا گلہ گھونٹ کر بادشاہت قائم کی تھی۔

دیوار برلن گرنے کے بعد امریکہ کے دشمن اور دوست بدل گئے۔ آزادی اور جمہوریت کے حق دار ان ملکوں کے شہری ہوگئے جو بوجہ امریکہ کے دشمنوں کی نئی لسٹ پر ہیں۔ ان میں سر فہرست عراق اور ایران تھے۔ عراق میں تو جو ہورہا ہے وہ سامنے ہے لیکن ایران ابھی تک چوہے بلی کا کھیل کھیل رہا ہے۔ لیکن بکرے کی ماں کب تک خیر منائے گی؟ بروز عید قربان ڈک چینی نے جنگ کا طبل بجا دیا ہے اور بش نے عراق جنگ سے پہلے کی لکھی تقریریں جھاڑ پونچھ کر دوسری مدت کی لئے تیار کر لی ہیں۔

اب ایک مرتبہ پھر جھوٹی تقریریں ہوں گی، ایران کے کونے کونے میں ایٹمی بموں کی موجودگی کے دعوے ہوں گے، ایران ہر دہشت گرد حملے کا معاون ثابت کیا جائے گا، کونڈالیزا رائس بنا معذرت کے اقوام متحدہ میں ایران کے خیالی اسلحے کے من گھڑت ثبوت پیش کریں گی، اسرائیل کی فضائیہ حملے کرے گی یا امریکہ کا بحری بیڑا اس کام کی لئے استعمال ہوگا وغیرہ وغیرہ سعودی عرب، اردن، مصر اور امارات میں پہلے کی طرح جموریت کی کوئی خاص ضرورت محسوس نہیں ہوگی، پاکستان میں فوجی مارکہ جموریت امریکہ کو من پسند رہے گی۔ بس جموریت اور آزادی ایران کو چاہیے ہوگی جہاں پہلے ہی منتخب حکومت قائم ہے۔

سوچنے کی بات یہ ہے کہ ایران کا قصور کیا ہے؟ اسرائیل کے پڑوس میں وہ واحد اسلامی ملک ہے جس کی کافی آبادی ہے، لوگ پڑھے لکھے ہیں اور ملک کے پاس تیل کے ذخائر ہیں۔ وہ اسرائیل کے لئے مستقبل میں خطرہ بن سکتا ہے۔