رام دت ترپاٹھی بی بی سی اردو، لکھنؤ

	ہندو شدت پسندوں کے ہاتھوں بابری مسجد کی مسماری کے بعد فرقہ وارانہ فسادات پھوٹ پڑے تھے۔

ایڈشنل ضلع مجسٹریٹ اور سیشن جج ایس ایم حسیب نے منگل کو مختصر سماعت کے بعد سزائیں سنائی۔ سزا پانے والے سبھی افراد ہندو ہيں جن پر کانپور میں گیارہ مسلمانوں کو زندہ جلا دینے کا جرم ثابت ہوا تھا۔

پیر کو عدالت نے ان پندرہ ملزمان کو قصوروار قرار دیا تھا جبکہ دیگر نو کو بری کردیاتھا۔ ملزمان میں سے ایک کی موت ہو چکی ہے۔

	فسادات میں مرنے والے دو ہزار افراد میں سے زیادہ تر مسمان تھے۔

ایودھیا میں واقع بابری مسجد کو چھ دمسبر 1992 کومسمار کر دیا گیا تھا جس کے بعد ملک کے بیشتر علاقوں میں فرقہ وارانہ فسادات کی لہر دوڑ گئی تھی۔ ان فسادات میں تقریباً دو ہزار افراد ہلاک ہوئے تھے جن میں بیشتر مسلمان تھے۔

کانپور میں پیش آنے والے اس واقعہ میں 10 دسمبر 1992 کو شہر کے گوندپور علاقے میں ہندوؤں کے ایک پر تشدد ہجوم نے گیارہ مسلمانوں کو جلا دیا تھا جن میں دو عورتیں اور ایک بچہ بھی شامل تھا۔

مقدمے میں چوبیس گواہ تھے جن میں دس عام شہری تھے۔ حالانکہ سبھی عام شہری بعد میں منحرف ہوگئے تھے۔ تاہم پولیس کے اہلکاروں نے فسادات ، قتل اور آتش زنی سے متعلق گواہی دی۔

اس درمیان وکیلِ صفائی یوگیش بھسین نے فیصلے کے خلاف ہائی کورٹ میں اپیل کرنے کی بات کہی ہے۔

مسٹر بھسین کا کہنا ہے کہ ملزمان کے خلاف باضابطہ طور پر کوئی ثبوت موجود نہیں ہے۔ ان کا کہنا تھا کہ دو برس قبل ان فسادات سے متعلق ایک دیگر مقدمے میں تمام ملزمان کو بری کر دیا گيا تھا۔