صلاح الدین بی بی سی اردو ڈاٹ کام، دلی

	ہندوستان میں سٹنگ آپریشن ذرائع ابلاغ کا ایک اہم حصہ بنتے جا رہے ہیں

سٹنگ آپریشن کے نشر ہونے کے بعد ٹیچر کے خلاف پر تشدد مظاہرے ہوئے تھے اور مشتعل ہجوم کو قابو میں کرنے کے لیے پولیس کو لاٹھی چارج کرنا پڑا تھی۔

پولیس کا کہنا ہے کہ اس معاملے کی تفتیش سے پتہ چلا ہے کہ یہ ایک’ جعلی سٹنگ آپریشن‘ ہے جسے توڑ مروڑ کر پیش کیا گیا ہے۔ پولیس کے ترجمان راجن بھگت نے بی بی سی کو بتایا کہ ’جو لڑکی سٹنگ آپریشن میں دکھائی گئی وہ طالب علم نہیں ہے اور اسے جسم فروشی کے لیے کھورانہ نے مجبور کیا ہو اس کا بھی ثبوت نہیں ہے‘۔

پولیس نے پہلے اس لڑکی کو حراست میں لیا تھا جس نے سٹنگ آپریشن میں اپنے آپ کو طالبہ کے طور پر پیش کیا ہے۔ چینل کے رپوٹر کو تفتیش کے لیے طلب کیا گيا تھا لیکن رپوٹر نے جب انکار کیا تو پولیس نےگرفتار کرلیا۔ خبروں کے مطابق مذکورہ لڑکی کا تعلق ایک ہندی اخبار سے ہے۔

ہندوستان میں سٹنگ آپریشن ذرائع ابلاغ کا ایک اہم حصہ بنتے جا رہے ہیں۔ اس کے مختلف پہلوؤں پر بحث مباحثے بھی ہوتے رہے ہیں۔ حکومت نے براڈ کاسٹنگ قوانین میں بعض تبدیلیوں کا اشارہ بھی کیا ہے۔ اطلاعات و نشریات کے وزیر پریہ رنجن دس منشی نے حال ہی میں کہا تھا کہ اس سے متعلق ایک بل پر غور ہو رہا ہے۔

لیکن ایک پرائیویٹ ادارے نیوز براڈ کاسٹنگ ایسوسی ایشن ’این بی اے‘ اس کا مخالف ہے۔ اس کے صدر جی کرشنن نے بی بی سی کو بتایا کہ اس طرح کی روک تھام کے لیے تمام پرائیوٹ چینلز ایک سیلف ریگولٹری سسٹم بنانا چاہتے ہیں۔ ’ ہم یہ نہیں چاہتے کہ بعض ایسے واقعات کی بنیاد پر حکومت مداخلت شروع کرے، ہم اسے روکنے کے لیے خود کے اصولوں پر عمل کریں گے لیکن حکومت کی طرف سےکوئی گائیڈ لائن نہیں چاہیے‘۔

سٹنگ آپریشن کی باقاعدہ شروعات تہلکہ ڈاٹ کام نے کی تھی۔اس نے واجپئی کی حکومت میں دفاعی سودوں میں بدعنوانی کے بعض معاملات کو اٹھانے کی کوشش کی تھی جس سے ملک میں زبردست سیاسی ہلچل پیدا ہوگئی تھی اور اس وقت کے وزیر دفاع کو استعفٰی دینا پڑا تھا۔

تہلکہ کے ایڈیٹر ترن تیج پال نے بی بی سی کو بتایا کہ سٹنگ آپریشن صحافی کے پاس ایک اچھا ہتھیار ہے لیکن اس کا بیجا استعمال بھی ممکن ہے۔ انہوں نے کہا کہ ’سٹنگ آپریشن سے عوام کا فائدہ ہوسکتا ہے، یہ اس بندوق کی طرح ہے جس سے برائی اور اچھائی دونوں کو نشانہ بنایا جاسکتا ہے۔ اب یہ چلانے والے پر ہے کہ وہ کس پر چلاتا ہے۔ یہ جو بھی کچھ ہوا ہے اس کی ہمیں مذمت کرنی چاہیے لیکن اچھی چیزوں کو سراہنا بھی چاہیے‘۔

مذکورہ سٹنگ آپریشن میں جس ٹیچر کا ذکر ہے وہ پرانے شہر کے ایک سکول میں پڑھاتی تھیں۔ ہنگامے کے بعد پولیس نے متعلقہ ٹیچر کو پوچھ گچھ کے لیے حراست میں لیا تھا اور بعد میں انہیں ملازمت سے برخاست کر دیا گیا تھا۔ وہ ٹیچر ابھی بھی عدالتی تحویل میں ہیں۔