کانگریس ایک بار پھر مسلمانوں کی خوشنودی حاصل کرنے کی پالیسی پر عمل پیرا ہے: بھارتیا جنتا پارٹی

پارلیمنٹ اور اسمبلیوں میں مسلمانوں کی نماندگی بہتر بنانے کے لیے بھی ایک کمیٹی تشکیل دی گئی ہے۔

لوک سبھا میں سچر کمیٹی کی رپورٹ روشنی میں کیے گیے اقدامات کی تفصیلات پیش کرتے ہوئے اقلیتی امور کے وزیر عبد الرحمن انتولے نے کہا کہ سرکاری نوکریوں میں مسلمانوں کا تناسب بہتر کرنے کے لیے حکومت نے ضروری ہدایات جاری کر دی ہیں۔

پارلیمنٹ اور اسمبلیوں میں مسلمانوں کی نماندگی بہتر کرنے کے لیے ایک اعلی اختیاراتی کمیٹی تشکیل دی گئی ہے جو انتخابی حلقوں کی تشکیل سے متعلق قانون کا جائزہ لے گی۔

سچر کمیٹی نے سیاسی عمل میں نچلی سطح سے ہی مسلمانوں کو شامل کرنے کی سفارش کی تھی اور کہا تھا کہ جن حلقوں میں مسلمانوں کی تعداد زیادہ ہے وہ سیٹیں ریزرو نہ کیں جائيں۔

مسٹر انتولے نے حکومت کی طرف سے پندرہ نکات پر مشتمل عملی اقدامات کی رپورٹ پیش کی جس کے مطابق سرکاری اداروں، سرکاری کمپنیوں، بینکوں اور تعلیمی اداروں میں مسلمانوں کے لیے تناسب کو بہتر بنانے کے لیے پہلے ہی ہدایات جاری کی جا چکیں ہیں۔

حکومت نے تکنیکی اور پیشہ وارانہ مضامین میں تعلیم حاصل کرنے والے مسلمان طلبہ کے لیے پہلے ہی بیس ہزار سکالرشپس کا اعلان کیا ہے۔

اب پری میٹرک اور پوسٹ میٹرک کلاسز میں بھی مسلمان طلبہ کے لیے سکیم شروع کی جا رہی ہے۔

مسلمانوں کے خلاف ہر طرح کی تفریق کے معاملات کاجائزہ لینے کے لیے بھی ایک مساوی مواقع کمیشن قائم کرنے کا بھی اصولی طور پر قیصلہ کیا ہے۔

سچر کمیٹی مسلمانوں کے حالات کا جائزہ لینے کے لیے قائم کی گئی تھی اور اس نے اپنی رپورٹ میں کہا تھا کہ مسلمان معیشت ، تعلیم، اور صحت کے ہر شعبوں میں بیشتر برادریوں سے پیچھے ہيں۔ کمیشن نے یہ بھی کہا تھا کہ ان کی پسماندگی کے پیچھے کچھ حد تک حکومت کی پالیسیوں کا بھی دخل ہے۔

معروف دانشور اور جامعہ ملیہ کے وائس چانسلر مشیر الحسن کا کہنا ہے کہ حکومت کے ان اقدامات اور دعوؤں پر نظر رکھنے کی ضرورت ہے لیکن اس کے نفاذ کی بہت بڑی ذمےداری خود مسلمانوں اور ان کے رہنماؤں کی ہے کیوں کہ کوئی بھی سماج اور اقتصادی پالیسی ان کے تعاون اور مدد کے بغیر کامیاب نہيں ہو سکتی۔

تاہم بھارتیہ جنتا پارٹی نے حکومت کے اقدامات پر نکتہ چینی کی ہے۔ پارٹی کے رہنما راجیو پرتاپ سنگھ روڈی کا کہنا تھا کہ ملک کی اکثریت بہت غریب ہے۔ ’لہذا حکومت کو مذہب کے بجائے غریبی کی بنیاد پر اس طرح کے اقدامات کرنے چاہئیں اور یہی ایک طریقہ ہے جو ملک کو آگے لے جا سکتا ہے‘۔

انہوں نے مزيد کہا کہ یہ قدم کسی نہ کسی طرح ووٹ کی سیاست کا حصہ ہے اور کانگریس ایک بار پھر مسلمانوں کی خوشنودی حاصل کرنے کی پالیسی پر عمل پیرا ہے۔