ریاض مسرور بی بی سی اردو ڈاٹ کام، سرینگر

	وادی میں حکومت نے ہنگامی صورتحال کا اعلان کر دیا ہے

مختلف حادثات میں، مٹی کے تودے، مکان اور درخت گرنے کے نتیجے میں ایک لڑکی سمیت 6 افراد ہلاک جبکہ سی آرپی ایف کی ایک گاڑی تباہ اور 4 اہلکار زخمی ہوئے۔ اس دوران جموں میں 9 سالہ بچی، ایک کمسن بچہ اور مزید دو افراد شدید سردی کے سبب لقمۂ اجل بن گئے۔ ادھر پلوامہ ، اننت ناگ ،بانڈی پورہ، سرینگر ،گاندربل اور کنگن سمیت دیگر کئی علاقوں میں قریب 200 رہائشی مکان گر گئے ہیں۔

وادی میں حکومت نے ہنگامی صورتحال کا اعلان کر دیا ہے۔ تعلیمی اداروں میں ایک ہفتے کی تعطیل کا اعلان کیا گیا ہے۔ تعلیمی ادارے یکم مارچ کو حسبِ معمول ڈھائی ماہ کی سرمائی تعطیلات کے بعد کھُل گئے تھے۔

وادی کے اضلاع کے درمیان ٹریفک نظام بری طرح سے متاثر ہے جبکہ ہوائی اڈے کی رن وے پر برف جمع رہنے کی وجہ سے تمام پروازیں منسوخ کر دی گئیں ہیں۔

اس دوران انٹرنیٹ اور ٹیلیفون کا نظام بھی بے حد متاثر ہوا ہے۔ ماہرین کا کہنا ہے کہ مارچ کے مہینے میں برفباری سے جموں ہائی وے پر چٹانیں کھسکنے اور میدانی علاقوں میں سیلاب کا خطرہ ہے۔

	ضروری چیزوں کی قلت سے عام زندگی مفلوج ہوکر رہ گئی ہے

حکومت نے ایک سینئر وزیر محمد دلاور میر کو صورتحال سے نمٹنے والے خصوصی سیل کا انچارج بنا دیا ہے۔

دلاور میر نے جموں سے بی بی سی کو فون پر بتایا: ’ہم تمام امکانات کا جائزہ لے رہے ہیں اور سارے متعلقہ محکمہ جات کو ہنگامی صورتحال کا مقابلہ کرنے کے لیے تیار رکھا گیا ہے‘۔

برفباری کی وجہ سے پوری وادی میں ضروری چیزوں کی قلت اور ٹریفک نظام کی ابتری سے عام زندگی مفلوج ہوکر رہ گئی ہے۔

تاخیر سے ہونے والی اس برفباری کے بعد جب منگل کی دوپہر کو مطلع صاف ہوا تو کھلکھلاتی دھوپ میں لوگوں کو جھومتے ہوئے دیکھا گیا ۔کشمیر کی ثقافت کا خوبصورت حصہ ’شینہ جنگ‘ یعنی برف کے گولوں سے لڑنا ایسا نظارہ تھا جس میں لوگ وہ مصائب پل بھر کے لیے بھول گئے جو یہ برفباری اپنے ساتھ لائی ہے۔