شکیل اختر بی بی سی اردو ڈاٹ کام، دلی

	سدھو نے سزا کے بعد لوک سبھا کی رکنیت سے استعفیٰ دے دیا تھا

پنجاب اور ہریانہ ہائی کورٹ کے فیصلے کے خلاف سدھو کی درخواست کی سماعت کرتے ہوئے عدالتِ عظمیٰ نے کہا ’سدھو کو قصوروار قرار دیے جانے کا فیصلہ معطل کیا جاتا ہے‘۔

سدھو کو تین سال قید کی سزا

سپریم کورٹ نے سزا پر عمل در آمد پر پابندی دو بنیادی وجوہات کی وجہ سے لگائی ہے۔ عدالت کا کہنا تھا کہ ایف آئی آر سے یہ واضح نہیں ہے کہ مقتول گرنام سنگھ کو مکا کس نے مارا تھا اور دوسرے یہ کہ گرنام کی موت برین ہیمریج یا دل کا دورہ پڑنے سے ہوئی یہ بھی واضح نہیں ہے۔

اس فیصلے کے بعد سدھو کے امرتسر لوک سبھا سیٹ سے ضمنی انتخاب لڑنے کا راستہ ہموار ہو گیا ہے۔ عدالت کے فیصلے پر اپنا ردعمل ظاہر کرتے ہوئے سدھو نے کہا ’میں عدالت کے ہر فیصلے کو بھگوان کا فیصلہ مانتا ہوں۔ عدالت کا جو بھی فیصلہ ہے میں اس پر عمل کروں گا‘۔

پنجاب و ہریانہ ہائی کورٹ نے گزشتہ سال دسمبر میں نوجوت سنگھ سدھوکو غیرارادتاً قتل کا مجرم قرار دیا تھا اور انہیں تین سال قید کی سزا سنائی تھی۔
یہ واقعہ 1988 میں پٹیالہ میں پیش آیاتھا۔ پولیس کی رپورٹ کے مطابق کار پارکنگ میں بحث و تکرار کے دوران سدھو نے 65 سالہ گرنام سنگھ کو مکا مارا تھا جس سے ان کی موت واقع ہوگئی تھی۔

ذیلی عدالت نے اس مقدمے میں سدھو کو رہا کر دیا تھا لیکن ہائی کورٹ نے انہیں غیر ارادتًا قتل کا قصورار پایا تھا۔ مقتول کے لواحقین نے بھی عدالتِ عظمیٰ میں ایک اپیل دائر کی ہے جس میں درخواست کی گئی ہے کہ سدھو کی سزا میں اضافہ کیا جائے اور ان کے خلاف ارادتاً نہیں بلکہ دانستہ قتل کا مقدمہ چلایا جائے۔ منگل کی اس فیصلے پر انہوں نے مایوسی بھی ظاہر کی ہے۔

نوجوت سنگھ سدھو امرتسر سے بھارتیہ جنتا پارٹی کے لوک سبھا کے رکن تھے۔ قصوروار قرار دیے جانے کے بعد انہوں نے لوک سبھا کی رکنیت سے استعفیٰ دے دیا تھا۔ فروری میں اسی حلقے کے انتخاب ہونے والے ہیں۔ نامزدگی کی آخری تاریخ 25 جنوری ہے۔ سپریم کورٹ کا فیصلہ آنے کے بعد سدھو کے حامی یہ توقع کر رہے ہیں کہ وہ دوبارہ انتخاب لڑیں گے۔ سدھو نے بھی اس بات کا اشارہ دیا ہے کہ وہ انتخاب میں حصہ لیں گے۔