شکیل اختر بی بی سی اردو ڈاٹ کام، دلی

	غرض زندگی کے ہر شعبے میں مسلمان دوسری برادریوں سے پیچھے ہیں

اس کمیٹی کی تفصیلات سے یہ واضح ہوگیا ہے کہ مسلمانوں ملک کے نئے دلت ہیں۔ وہ تعلیم میں، تجارت میں، ملازمت میں، صحت میں غرض زندگی کے ہر شعبے میں ملک کی دوسری برادری سے پیچھے ہیں۔ سچر کمیٹی نے نہ صرف ان کی پسماندگی کا تجزیہ کیا ہے بلکہ اپنی رپورٹ کے ایک باب میں اس نے مسلمانوں کے سب سے پسماندہ طبقے کو رزرویشن دینے کی بھی سفارش کی ہے۔

حقوق سے نا آشنا مسلمان  مسلمان خود اپنے حقوق سے نا آشنا ہیں، تعلیم اور ملازمت میں جو سہولیات انہیں دی جا چکی ہے وہ انکا بھی فائدہ نہیں اٹھا پائے ہیں دلت رہنما ادت راج

ہندوستان کے مسلمانوں کی پسماندگی سمجھنے لیے یہ ضروری ہے کہ پہلے یہ جانا جائے کہ یہاں کے مسلمانوں کا معاشرہ بھی ہندؤں کی طرح مکمل طور پر ذات پات پر مبنی ہے۔ شادی بیاہ سے لے کر انسانی رشتوں اور برتا‎ؤ تک کا تعین ذات کی بنیاد پر ہوتا ہے ۔ مسلمانوں کے تمام اہم تعلیمی اداروں اور مذہبی اداروں پر ابتدا سے ہی اعلیٰ ذات کے مسلمانوں کا قبضہ رہا ہے۔

ہندوستان میں مسلمانوں میں تعلیم کے لیے کبھی کوئی تحریک نہیں رہی ہے۔ مسلمانوں کے تمام بڑے مذہبی اداروں نے بلاواسطہ یا بلواسطہ طور پر جدید تعلیم کے حصول کی حوصلہ شکنی کی ہے۔ ذات پات کے نظام نے صورتحال کو مزید پیچیدہ بنا دیا ہے۔ خود مسلمان بھی چھو ٹے موٹے کاموں کو تعلیم پر ترجیح دیتے رہے ہیں۔

	بابری مسجد گرائے جانے کے بعد ملک میں قتل و خون کا بازار گرم ہو گیا

سیاسی جماعتیں پارلیمنٹ اور اسمبلیوں کے لیے مسلمانوں کو مناسب نمائندگی نہیں دیتیں۔ سیاست میں عموما ایسے مسلمانوں کی حوصلہ افزائی کی گئی ہے جودور جدید کے تقاضوں کے شعور سے نا آشنا تھے۔

دلت رہنما ادت راج کا کہنا ہے کہ مسلمان گزشتہ ڈیڑ ھ سو برس سے صرف مذہبی اور نزاعی معاملات میں الجھے ہوئے ہیں ۔ ’وہ انتخاب میں اپنی روزی روٹی، تعلیم اور ملازمت کا سوال نہیں اٹھاتے وہ صرف یہ دیکھتے ہیں کہ بی جے پی کو کیسے شکست ہو، یہ ایک منفی رجحان ہے‘۔ ادت راج کا خیال ہے کہ مسلمانوں کو اس طرح کی نفسیات سے باہر آنا ہو گا۔

	سیاست میں عموما مسلمانوں کی حوصلہ افزائی نہیں کی جاتی

سماجی امور کے ماہر یوگیندر یادو کا بھی یہ ہی خیال ہے کہ ’مسلمان خود اپنے حقوق سے نا آشنا ہیں، تعلیم اور ملازمت میں جو سہولیات انہیں دی جا چکی ہے وہ ان کا بھی فائدہ نہیں اٹھا پائے ہیں‘۔

ہندوستان تیزی سے ترقی کررہا ہے۔ پیداوار کے روایتی طریقے بدل رہے ہیں۔روایتی گھریلو صنعتیں شدید دباؤ سے گزر رہی ہیں۔ آنے والے دنوں میں چھوٹی اکائیوں کی جگہ بڑی کمپنیاں لے لیں گی۔ نئے معاشی نظام میں چھوٹی چھوٹی ملازمت کے لیے بھی تعلیم ایک ضرورت ہوگی۔ اپنی تعلیمی پسماندگی کے سبب مسلمانوں کے لیے پیچیدگیاں اور بڑھیں گی۔

ہندوستان کا مسلمان ایک ایسے مقام پر کھڑا ہے جہاں وہ اب مزید غلطیوں کا متحمل نہیں ہوسکتا ہے۔ یہ ایک مشکل صورتحال ہے۔ سچر کمیٹی کی رپورٹ حکومت کی طرف سے مسلمانوں کی صورتحال کو سمجھنے کی یقیناً ایک سنجیدہ کوشش ہے۔ اور اس سلسلے میں بعض اقدامات کے پہلے اشارے کیے جاچکے ہیں۔ لیکن مسلمانوں کو بھی اپنی کمیوں کا تجزیہ کرنا ہوگا اور خود بھی انہیں دور کرنے کے راستے تلاش کرنے ہوں گے۔