ریحانہ بستی والا
بی بی سی اردو ڈاٹ کام، ممبئی |  |
| | | مظاہرین نے قبرستان میں جاری تعمیراتی کام روکنے کے لیئے پولیس پر پتھراؤ کیا تھا |
بھیونڈی پولیس کا کہنا ہے کہ پانچ جولائی کی شب دو پولیس اہلکاروں کے قتل کے الزام میں سو مسلمانوں کے خلاف کیس درج کر لیا گیا ہے۔ اہم ملزمان میں بھیونڈی کے مسلمانوں کی مذہبی تنظیم رضا اکیڈمی کے صدر شکیل رضا اور اسی تنظیم کے رکن غلام نبی انصاری شامل ہیں۔ پولیس نے اس کیس میں پندرہ ملزمان کو نامزد کیا ہے بقیہ ملزمان کونامعلوم قرار دیا گیا ہے۔ بھیونڈی پولیس نے قتل کے اس الزام کے ساتھ ہی نظام پورہ، کمہار واڑہ اور بھوئیواڑہ پولیس تھانوں کے تحت ڈھائی ہزار مسلمانوں کے خلاف فساد برپا کرنے، سرکاری املاک کو تباہ کرنے کا کیس درج کیا ہے۔ پولیس ذرائع کے مطابق گرفتاریاں جمعہ کی رات سے شروع کر دی جائیں گی۔ کیونکہ پولیس جمعہ کی نماز اور پولیس فائرنگ میں مرنے والوں کے کے لیئے ہونے والی قرآن خوانی ہو جانے کا انتظار کررہی تھی۔ پانچ جولائی کو پولیس سٹیشن بنانے پر تنازعہ کھڑا ہوا تھا۔ مسلمانوں کا دعویٰ ہے کہ یہ زمین وقف بورڈ کی ہے اور اسے قبرستان کے لیئے مختص کیا گیا ہے جبکہ پولیس کا کہنا تھا کہ یہ زمین سرکاری ہے جس پر ستر سال سے پولیس کا قبضہ ہے ۔ مہاراشٹر کے مسلم اکثریتی آبادی والے اس شہر میں تقریبا سات لاکھ مسلمان آباد ہیں ۔ 1970 اور 1984 کے فرقہ وارانہ فسادات کے بعد اب یہ شہر فرقہ وارانہ ہم آہنگی کی مثال بن چکا ہے لیکن پولیس کے ساتھ جھڑپ کے بعد فرقہ وارانہ فساد کا خدشہ سر اٹھار رہا تھا لیکن محلہ امن کمیٹی کے ممبر گوپال کرشن سنگھ کا کہنا ہے کہ دونوں فرقوں میں امن و امان برقرار رکھنے کے لیئے معززین کی میٹنگ اور بر وقت مداخلت نے اس خطرے کو ٹال دیا۔ | 
مہاراشٹر: قبرستان تنازعہ، دو ہلاک 
