صلاح الدین بی بی سی اردو ڈاٹ کام، دلی

	عدالت نے برطانوی شہریوں کو چھ چھ برس قید با مشقت کی سزا سنائی ہے

ایک برطانوی شہری ڈنکن گرانٹ پر بیس ہزار پونڈ کا جرمانہ بھی عائد کیا گیا ہے۔

عدالت نے ڈنکن گرانٹ اوران کے ایک دوست الن واٹرس کو یتیم بچوں کے ساتھ جنسی زیادتی کا مجرم پایا ہے اور انہیں چھ چھ برس قید با مشقت کی سزا سنائی ہے جبکہ ایک ہندوستانی شہری کو ان کی مدد کرنے کے جرم میں تین برس قید کی سزا سنائی گئی ہے۔

نابالغ بچوں کے ساتھ جنسی زیادتی کا یہ معاملہ کئی اتار چڑھاؤ کے سبب کافی دنوں سے سرخیوں میں رہا تھا اور ہائی کورٹ کے احکامات کے بعد پولیس نے سختی سے اس کی تفتیش کی تھی۔

فیصلہ سناتے وقت جج پی ایس پرانجپے نے سخت الفاظ میں کہا ہے کہ انہیں امید ہے کہ ان کا یہ فیصلہ ہندوستان میں ’جنسی سیاحت‘ کو ختم کرنے میں مدد گار ثابت ہوگا۔

برطانوی شہری ڈنکن گرانٹ سنہ انیس پچانوے میں ممبئی آئے تھے اور کلابہ کے علاقے میں لاوارث بچوں کی مدد کے لیے اینکرایج شیلٹر کے نام سے ایک یتیم خانہ کھولا تھا لیکن کچھ ہی دنوں بعد اس بات کا انکشاف ہوا کہ ڈنکن اور ان کے دوست یتیم خانے میں مقیم نابالغ بچوں کا جنسی استحصال کرتے تھے۔

اس معاملے کے سامنے آتے ہی ڈنکن اور ان کے دوست بھارت سےفرار ہوگئے تھے۔

پولیس نے واٹرس کے بارے میں انٹر پول کو ریڈ کارنر نوٹس جاری کیا تھا جس کے بعد دو ہزار چار میں انہیں امریکہ سے بھارت لایا گیا تھا۔ گزشتہ سال جون میں ڈنکن نے بھی ممبئی میں اپنے آپ کو پولیس کے حوالے کردیا تھا۔

بھارت سے بھاگنے کے بعد ڈنکن گرانٹ نے تنزانیہ میں بھی ایک یتیم خانہ کھولا تھا اور وہاں بھی ان کے خلاف اسی قسم کے الزامات سامنے آئے تھے۔

کولابہ میں اینکرایج شیلٹر کی دیکھ بھال کرنے والے ایک ہندوستانی شہری ولیم ڈی سوزا کو دو ہزار ایک میں گرفتار کیا گیا تھا لیکن پھر انہیں ضمانت پر رہا کردیا گیا تھا۔

عدالت نے انہیں مجرموں کی مدد کرنے کے الزام میں تین برس قید کی سزا سنائی ہے۔