نادیہ پرویز بی بی سی اردو ڈاٹ کام، دلّی

	ریل کے شروع ہونے میں تقریبا 15 سے 20 دن تک کا وقت لگ سکتا ہے

ہندوستان کے ریلوے حکام نے کہا ہے کہ دونوں ممالک کے درمیان اس ریل سروس سے متعلق تمام پہلوؤں پر بات چیت مکمل ہو چکی ہے لیکن ابھی باضابطہ معاہدے پر دستخط ہونا باقی ہیں۔ ریلوے کے ایک اعلی اہلکار نے بی بی سی کو بتایا کہ’تھر ایکسپریس‘ کا آغاز یکم فروری سے ہونا تھا لیکن اب وہ پندرہ سے بیس دن تاخیر سے چلے گی۔

یاد رہے کہ پاکستانی حکام نے تھر ایکسپریس کے آغاز کی تاریخ یکم فروری سے بڑھا کر چار فروری کرنے اعلان کیا تھا۔

ریلوے اہلکار کے مطابق’ آئندہ 30 اور 31 تاریخ کو پاکستان نے معاہدے پر دستخط کرنے کے لیے ہمیں دعوت دی ہے‘۔ انہوں نے بتایا کہ’معاہدے پر دستخط ہونے کے بعد اس ریل کے شروع ہونے میں تقریبا 15 سے 20 دن تک کا وقت لگ سکتا ہے‘۔

اس مہینے کی ابتدا میں ہندوستان اور پاکستان کے ریلوے افسران نے دو روز کی بات چیت کے بعد اعلان کیا تھا کہ یکم فروری سے تھرایکسپریس شروع ہو جائے گی اور اب اس میں مزید تاخیر نہیں ہوگی کیوں کہ اس سے متعلق تمام تیاریاں مکمل ہو چکی ہیں۔

بعض خبروں میں بتایا گیا ہے کہ اس ریل سے متعلق سلامتی کے پہلوؤں کو بھی ابھی حتمی شکل نہیں دی جا سکی ہے اور تمام پہلوؤں کے مکمل ہونے کے بعد ہی یہ ٹرین چل سکے گی۔ یاد رہے کہ سندھ اور راجستھان کی سرحدوں کے درمیان آخری بار 1965 میں ریل چلی تھی۔