نادیہ پرویز بی بی سی اردو ڈاٹ کام، دِلّی

فیشن ڈیزئنر مالینی رمانی قومی پرچم پہن کر ریمپ پر چلیں تھیں

ہندوستان میں قومی پرچم کو لباس کے طور پر پہننا بہت ہی جلد ممکن ہو جائےگا لیکن قومی پرچم پر مشتمل ملبوسات کو کمر کے نیچے پہنے کی اجازت نہیں ہوگي۔

وہ دن اب دور نہیں ہیں جب ریمپ پر کیٹ واک کرتی ہوئی ماڈلز قومی پرچم پہنے نظر آئيں گی اور کھلاڑیوں کے یونیفارم پر بھی قومی پرچم کے تینوں رنگ اور چکر دور سے ہی نظر آئیں گے ۔

مرکزي کابنیہ نے قومی پرچم کے احترام کے متعلق ایک ایکٹ میں ترمیم کا فیصلہ کیا ہے۔ حکومت نے فیصلہ کیا ہے کہ قومی پرچم کے استعمال پر جو پابندیاں عائد ہیں ان میں کچھ نرمی کی جائے۔ اس سلسلے میں آئندہ پارلیمانی اجلاس میں ایک بل کو لانے پر غور کیا جارہا ہے۔

تاہم خاص بات یہ ہے کہ قومی پرچم کی علامات والے لباسوں کو کمر کے نیچے پہننے کی اجازت نہیں ہوگی۔ اطلاعات کے مطابق رومال ، تکیہ غلاف اور دستانوں پر بھی قومی پرچم کے استعمال پر پابندی جاری رہے گی۔

قومی پرچم کو لباس کے طور پر پہننے کا معاملہ اس وقت روشنی میں آیا تھا جب انڈیا فیشن ویک کے پہلے برس فیشن ڈیزئنر مالینی رمانی قومی پرچم پہن کر ریمپ پر چلیں تھیں۔ ان کے لباس پر کئی لوگوں نے اعتراض کیاتھا۔ اس بات کے لیے محترمہ رمانی پر گزشتہ چھ برسوں سے مقدمہ بھی چل رہا ہے۔

بعض افراد نے کرکٹ کھلاڑیوں کے یونیافارم پر قومی پرچم کے بنےہونے پر بھی اعتراض کیا تھا۔ مشہور بلے باز سچن تندلکر کے ہیلمٹ اور سورو گنگولی کے دستانے پر قومی پرچم بنا رہتا تھا۔

انہیں حالات کے مد نظر حکومت نے قومی پرچم لہرانے اور اسے نمایاں کرنے کے متعلق ایکٹ میں بعض ترامیم کی ہیں۔ نئے قانون کے تحت قومی پرچم کی بے حرمتی پر سخت سے سخت سزا کی تجویز رکھی گئی ہے۔

ہندوستانی آئین کے مطابق قومی پرچم لہرانے اور اسے نمایاں کرنے کا حق صرف مخصوص افراد کو ہے۔ اس بارے میں ہندوستان کے ایک کامیاب تاجر اور پارلیمانی رکن نوین جندل نے عدالت میں ایک درخواست داخل کی تھی۔

مسٹر جندل نے یہ درخواست قومی پرچم کو سیاسی جائداد کے طور پر استعمال کیے جانے کے خلاف داخل کی تھی ۔ ان کا کہنا تھا کہ قومی پرچم کسی حکومت کی ذاتی جائداد نہیں ہے بلکہ اس کے مالک عوام ہیں۔