صلاح الدین بی بی سی اردو ڈاٹ کام، دِلّی

جنرل مشرف بھارتی رہنما کو کھیل کے رموز سمجھاتے رہے

اس موقع پر جہاں دونوں رہنماؤں نے دوستانہ ماحول میں بات چیت کی وہیں صدر پاکستان نے مسٹر سنگھ کو کرکٹ کے متعلق کچھ چیزیں بھی سمجھائیں۔

میچ شروع ہونے سے قبل دونوں رہنماؤں نے فیروز شاہ کوٹلہ گراؤنڈ پر دونوں ٹیموں کے کھلاڑیوں سے مصافحہ کیا اور پھر وی آئی پی گیلری میں بیٹھ کر میچ دیکھا۔ ابتداء میں شاہد آفریدی جارحانہ بیٹنگ کررہے تھے اور صدر پاکستان نے اسکا خوب لطف اٹھایا۔

سٹیڈیم سے باہر آنے کے بعد صدر مشرف نے کہا کہ ’ کھیل اچھا اور کافی دلچسپ تھا اور انہوں نے اسکا خوب مزا لیا۔‘

صدر پاکستان کے ساتھ وزیراعظم منموہن سنگھ کے علاوہ انکی اہلیہ گرشرن کور بھی وھاں موجود تھیں اور اطلاعات کے مطابق صدر پرویز مشرف نے اس دوران کرکٹ کے بارے میں انہیں کئی چیزیں بتائیں۔

خبروں کے مطابق منموہن سنگھ کی اہلیہ نے پوچھا کہ بورڈ پر جو ایل ایف ڈبلیو اور ایل ایس ڈبلیو لکھا ہے اس کا کیا مطلب ہے تو صدر مشرف نے اسکی تشریح کرتے ہوئے کہا کہ ’لاسٹ وکٹ فال یعنی آخری وکٹ کب گری اور لاسٹ وکٹ اسکور یعنی آخری وکٹ کا اسکور کیا ہے۔‘

دونوں ملکوں کے رہنماؤں کا ایک ساتھ بیٹھ کر میچ دیکھنے کا یہ دوسرا تاریخی موقع تھا۔ اس سے قبل انیس سو ستاسی میں پاکستان کے صدر جنرل ضیاءالحق نے جے پور میں ٹیسٹ میچ دیکھا تھا۔ اس وقت کے ہندوستان کے وزیراعظم راجیو گاندھی نے انکی مہمان نوازی کی تھی۔