صلاح الدین بی بی سی اردو ڈاٹ کام دِلّی

’ہندوستان اور پاکستان کے درمیان تجارت کے شعبے میں بہت کچھ کرنے کو ہے‘

دونوں ملکوں کے اقتصادی ماہرین پر مشتمل یہ گروپ مختلف اشیاء، خدمات اور سرمایہ کاری جیسے شعبوں میں نئے امکانات اور اور ترجیحات کاپتہ لگائے گا۔

اس کا مقصد دونوں ملکوں کے درمیان صنعتی و تجارتی رشتوں کو مزید فروغ دینا ہے۔

ہندوستان کے وزیر صنعت و تجارت کمل ناتھ مرارکا نے بتایا کہ یہ فیصلہ ان کی پاکستانی صدر جنرل پرویز مشرف اور ان کے پاکستانی ہم منصب ہمایوں اختر خان سے بات چیت کے بعد کیا گیا۔ اس سٹڈی گروپ کی سربراہی دونوں ملکوں کے کامرس سکریٹری کریں گے۔

پاکستان کے دورے سے واپسی پر کمل ناتھ نے نئی دِلّی میں پاکستانی وزیراعظم شوکت عزیز سے بھی ملاقات کی ہے۔

ہندوستانی وزیر نے ایک بیان میں کہا ہے کہ پاکستان کے صدر جنرل پرویز مشرف سے انکی ملاقات بہت ہی مثبت تھی اور انہوں نے ہندوستان و پاکستان کے درمیان تجارتی تعلقات کے حوالے سے کئی امور پر بات چیت کی ہے۔

کمل ناتھ نے کہا کہ ہندوستان اور پاکستان کے درمیان تجارت کے شعبے میں بہت کچھ کرنے کو ہے لیکن عملی طور پو اس میدان میں بہت کم کام ہو رہا ہے۔

انہوں نے کہا کہ صدر مشرف نے تجارت کو مزید فروغ دینے کی ضرورت پر دیا اور ساتھ ہی دیگر باہمی امور کے حل کے لیے بامعنی مذاکرات کی بات بھی کی۔

کمل ناتھ مرارکا نے بتایا کہ اسلام آباد میں سارک ممالک کے صنعت و تجارت کے وزراء سے انکی ملاقات کافی مفید رہی ہے ۔