شکیل اختر بی بی سی اردو ڈاٹ کام، دلی

بھارتیہ جنتا پارٹی نے مطالبہ کیا ہے کہ مسٹر تسلیم الدین کو وزارتی کونسل سے فورا باہر کیا جائے۔

مہندرا اینڈ مہندرا کمپنی کے ایک ڈیلر نے شکایت درج کی ہے کہ سول سپلائی کے وزیر تسلیم الدین نے پانچ برس قبل ایک جیپ خریدنے کے لۓ تین لاکھ روپے کا ایک چیک دیا تھا جو بینک سے خالی لوٹ آیا تھا یعنی باؤنس ہو گیا تھا۔

کمپنی کے وکیل نگیندر کمار نے بتایا ہے کہ پٹنہ کے فرسٹ کلاس جوڈیشل مجسٹریٹ نے مسٹر تسلیم الدین کے خلاف وارنٹ جاری کرتے ہوۓ ایر یا کے سپریٹنڈنٹ آف پولیس کو حکم دیا ہے کہ وہ گرفتاری کے وارنٹ پر فورا عمل کریں۔

عدالت نے آئندہ سماعت کے لۓ 20 جنوری کی تاریخ مقرر کی ہے۔

بھارتیہ جنتا پارٹی نے مطالبہ کیا ہے کہ مسٹر تسلیم الدین کو وزارتی کونسل سے فورا باہر کیا جاۓ۔ پارٹی کے سینر رہنما سشیل مودی نے مسٹر تسلیم الدین کو ''عادی قصوروار'' بتایا ہے۔

مسٹر مودی نے کہا ہے کہ تسلیم الدین کو مجرمانہ ریکارڈ کے سبب ایک بار پہلے بھی دیوگوڑا حکومت سے نکالا جا چکا ہے۔ سپریم کورٹ نے حال میں بہار حکومت کے اس طرز عمل پر نکتہ چینی کی تھی جس تحت اس نے مسٹر تسلیم الدین کے خلاف بعض پرانے مجرمانہ معاملات اچانک واپس لے لئے تھے ۔

مسٹر مودی نے کہا ہے کہ منموہن سنگہ حکومت تسلیم الدین کے مجرمانہ ریکارڈ کے باوجود انہیں نہ نکال کر ان کی پشت بناہی کر رہی ہے۔

سول سپلائی کے وزیرمملکت تسلیم الدین کے خلاف چیک باؤنس ہونے اور روپیہ ادا نہ کرنے کے علاوہ بھی بہار میں متعدد مقدمات درج ہیں ۔ حزب اختلاف کی جما عتیں ایک عرصے سے ان کے استعفی کا مطالبہ کر رہی ہیں۔