’سیاست دو دھاری تلوار ہے اور اگر اچھے نتائج نہ دکھائے تو عوام جو انھیں عزت دیتے ہیں نظروں سے گرا دیں گے‘

پروگرام میں فلمی ستاروں سے سوال کیا گیا تھا کہ وہ الیکشن کے موقع پر ہی سیاست میں کیوں داخل ہو رہے ہیں اور کیا ان کی حثیت محض نمائشی ہے یا ان میں کوئی دم خم بھی ہے کہ وہ اپنی سیاسی جماعت کے لیے فائدہ مند ثابت ہو سکیں۔

حکمران جماعت بی جے پی کی انتخابی مہم میں پیش پیش اور بھارتی فلموں کے مشہور ولن شترو گن سنہا نے اس سوال کے جواب میں کہا کہ وہ اس جماعت میں شامل ہونے والے اولین فنکاروں میں سے ہیں۔

انھوں کا کہنا تھا کہ ’میں بی جے پی میں اس وقت شامل ہوا جب یہ حکومت میں نہیں تھی۔ میں اس وقت بھی مشہور تھا اور آج بھی مشہور ہوں۔ نہ میں تھکا ہوں اور نہ ہی ریٹائر ہوا ہوں۔‘

انھوں نے اپنے نئے آنے والے ساتھیوں پر تنقید کرنے سے انکار کرتے ہوئے کہا ’میں ان کا مذاق نہیں اڑاؤں گا۔ اچھے لوگوں کو سیاست میں آنا چاہیے اورصرف یہ کہہ دینا کہ اس میدان میں بد قماش نہیں چل سکتا کافی نہیں ہے۔‘

انھوں نے کہا کہ نئے آنے والے اداکاروں کی حوصلہ افزائی کی جانا چاہیے یہ ضروری نہیں کہ نئے آنے والے ہر بات جانتے ہوں۔ اگر ایسا ہو تو کوئی نیا شخص سیاست میں داخل نہ ہو سکے گا۔

پروگرام میں ان کے علاوہ مہیش بھٹ اور موسمی چٹر جی نے بھی حصہ لیا۔